Do “tanque con rodas” de Obama ao taxi de Revilla

“Ao final acabará comprando outro coche e terá que blindalo”. Desta forma expresou a secretaria de Acción Electoral do PSOE, Mar Barcón, a súa opinión acerca da idea de Alberto Núñez Feijóo, de prescindir dun coche oficial blindado para vendelo –200.000 euros máis barato do que se mercou– e quedar con outro sen este servizo de seguridade.

Feijóo non é o único presidente que decide prescindir da blindaxe do seu coche. Nos medios de comunicación é habitual ver a figura do presidente cántabro, Miguel Ángel Revilla, baixando dun taxi para asistir a calquera acto oficial. Non obstante, a maioría dos altos cargos deciden empregar a blindaxe nos seus turismos, aínda que, na maioría dos casos, hai un maior mutismo á hora de falar dos vehículos oficiais, alegando motivos de seguridade.

No País Vasco, o novo lehendakari, Patxi López, herdou os coches oficiais dos seus antecesores no cargo. Un Mercedes S560 de José Antonio Ardanza e un Audi A8 de Juan José Ibarretxe, ambos blindados.

Igualmente, o presidente socialista de Aragón, Marcelino Iglesias, dispón tamén doutro modelo alemán con sistema anti balas. O mesmo modelo co que ten o mandatario rioxano, Pedro Sanz.

Famosos entre a prensa xa son os Audi A8 do presidente Zapatero e o líder da oposición, Mariano Rajoy, así como o Mercedes S600 Guard do Rei Juan Carlos.

Preguntados polo tema dos blindaxes nos coches oficiais, a maioría dos expertos en seguridade recordan o atentado da banda terrorista ETA contra José María Aznar. Foi en abril do ano 95 cando, o nese momento líder da oposición, sufriu un atentado en plena rúa. O hoxe ex presidente do Goberno saiu ileso grazas aos case mil quilos de blindaxe do seu vehículo, de novo un Audi A8.

Así, mentres que o presidente galego, decidiu, polo momento, prescindir dunha blindaxe no seu vehículo oficial, o presidente da Deputación da Coruña, Salvador Fernández Moreda, si leva un turismo dotado dun sistema de blindaxe.

José Manuel Gómez Besteiro, o presidente da Deputación de Lugo e José Luis Baltar, o seu homólogo en Ourense, gozan de vehículos de alta gama, tamén da marca Audi, tan denostada polo Executivo de Alberto Núñez Feijóo, pero sen blindar. “Eu creo que aquí en Galicia é un pouco esaxerado que un presidente de Deputación leve un coche blindado. Tamén hai outros presidentes de comunidades autónomas que non o levan”, din dende o gabinete de prensa de Baltar.

Nas antípodas do vehículo oficial de Alberto Núñez Feijóo está, o denominado pola prensa estadounidense, “tanque con rodas” de Barack Obama. Un modelo Cadillac con materiais como acero e aluminio e con vidros de 13 centímetros de espesor.