‘Pachi’ Vázquez cre que Galicia Bilingüe está a “dramatizar” coa lingua galega

O secretario xeral do PSdeG, Manuel Vázquez, saiu onte ao paso das declaracións da presidenta de Galicia Bilingüe (GB), Gloria Lago quen, despois de reunirse cos deputados socialistas Francisco Cerviño e Guillermo Meijón, instou ao PSOE a reformular a súa política lingüística.

Se ben Vázquez ten claro que GB ten “dereito” a “defender os seus intereses”, o líder socialista non dubida que o colectivo, contrario á normalización do galego, “dramatiza a situación” relativa ao idioma nun contexto no que é o galego o que ten “un problema de subsistencia”.

Nun contexto no que, apunta, o PSOE e o colectivo dirixido por Lago “discrepan no 95 por cento das súas opinións”, Vázquez avoga por “enterrar a guerra lingüística que armou” o presidente da Xunta, Alberto Núñez Feijóo, dados os “problemas” da lingua propia de Galicia.

Por outro lado, no ámbito do ensino permanece a incógnita sobre o resultado e a participación na enquisa distribuída pola consellería de Educación entre os pais e nais de alumnos.

Aínda que o departamento dirixido por Jesús Vázquez asegurou que “cinco ou dez días despois” de finalizar o inquérito –o pasado 19 de xuño–, Educación recoñece que os resultados aínda non están dispoñibles.

Neste sentido, o secretario xeral de Política Lingüística, Anxo Lorenzo, asegura “non ter noticia” da data en que estes resultados serán “públicos”.

Aínda no ámbito da lingua, a Mesa Pola Normalización Lingüística informou onte de que un informe da Avogacía do Estado respalda, xuridicamente, a denuncia de acoso laboral polo uso do galego a tres traballadores da Capitanía de Burela.