Turismo destina 1,5 millóns para promocionar as visitas a Galicia

A secretaria xeral de Turismo, Carmen Pardo, amosouse confiada en que as reservas hoteleiras descendan por debaixo do 20% durante o período estival respecto ás cifras do pasado ano.

Así o apuntou Pardo durante a presentación da semana na que o Pazo de Exposicións e Congresos de A Coruña (Palexco) converterase, segundo indicou o seu director, Enrique Pena, "no centro de debate da industria mundial de reunións" coa presenza de representantes dos principais pazos de congresos dos cinco continentes.

"Hai un mes a situación do turismo galego era mala", sostivo Pardo, ao tempo que se mostrou confiada en que os datos que a Xunta presentará a finais deste mes mostren "un repunte" en canto ás reservas hoteleiras na Comunidade galega.

"Hai que ver como afecta a campaña que realizamos a través dos medios de comunicación", dixo Pardo e recordou que o turismo rural "só perdeu un 10 por cento de reservas", algo que, segundo precisou a Xunta, podería trasladarse ao resto de sectores.

A Torre, reforzo turístico

Por outra parte, Carmen Pardo mostrouse "moi satisfeita" de que a Torre de Hércules obtivese a distinción de monumento Patrimonio da Humanidade, algo que a secretaria xeral de Turismo confirmou que espera utilizar "como reforzo" para atraer xente.

"Galicia ten o privilexio de contar con catro monumentos catalogados como Patrimonio da Humanidade", apuntou Pardo, para quen este feito debe converterse nun "argumento máis" á hora de presentar un oferta turística "máis variada" que en lugares onde só hai "sol e praia".

Creador de opinión

Finalmente, a secretaria xeral de Turismo referiuse á repercusión que ten a celebración de congresos, exposicións e conferencias en Galicia para a promoción do turismo.

Segundo indicou Pardo, o turista "profesional", ademais de gastar o dobre que o visitante "tradicional", se converte no mellor "creador de opinión" para que, máis tarde, as persoas que chegaron a Galicia por motivos de traballo, "o fagan acompañados das súas familias".

A secretaria xeral sinalou que a Xunta aprobará un presuposto dun millón e medio de euros para fomentar a celebración deste tipo de acontecementos nos próximos meses, coincidindo co ano Xacobeo.