A Universidade de Vigo galeguiza iTunes U

A educación do futuro conectará a profesores e alumnos con imaxes, textos e sons a través de internet. A Universidade de Vigo avanza nese camiño desde 2003 e acaba de dar un grande salto a nivel internacional ao converterse na primeira institución de fala hispana en ofrecer os seus contidos educativos a través da meirande e máis prestixiosa plataforma do momento, o iTunes U de Apple. Iván Area, vicerreitor de Relacións Institucionais, considera que isto "demostra unha vez máis que estamos á vangarda na utilización de novas tecnoloxías e na aposta pola docencia de calidade".

Deste xeito, a entidade galega converteuse no emblema da compañía norteamericana para penetrar no mercado hispano dos EEUU. Por ese motivo, a empresa controlou moi de preto todo o proceso desde a sede central, en lugar de deixalo en mans da delegación europea, como é habitual. De feito, o lema de Apple para a promoción do acontecemento é "iTunes habla español", segundo conta o vicerreitor de Novas Tecnoloxías e Calidade de Vigo, Anxo Sánchez. Aínda que ben podería ter sido "iTunes fala galego" porque, ademais de ser a primeira universidade do mundo hispano en entrar nesta plataforma, faino con arquivos en galego, ademais de en castelán e inglés.

"Eso foi o noso acordo: parécenos todo ben, pero vostedes permítennos tamén meter a nosa idiosincrasia", conta Sánchez. "Pero recibírono ben", asegura. Non é que houbese unha negociación, "pero non entenden que queiramos publicar contidos en tres idiomas". Porén, amais da idiosincrasia galega, o galego tamén permite chegar a máis países: "Temos un importante volume de descargas de Portugal e Brasil grazas ao galego".

Prestixio e rendemento en posgraos

Anxo Sánchez confía en que, con este novo escaparate, se note "unha repercusión no posgrao, porque se incrementará a audiencia e faremos másters con Hispanoamérica". As previsións da universidade son que preto do 90% das descargas se fagan desde fóra de España. Na actualidade, a metade das descargas do material que xa se ofrece libremente a través de Uvigo.tv fanse desde o exterior.

En calquera caso, o que buscan "todas as universidades ao entrar en iTunes U é a garantía e o prestixio que dá, porque é a única plataforma que, ao contrario que outras como YouTube, fai un control e aplica un filtro que esixe unha serie de requisitos, como ter capacidade para publicar 250 programas educativos ao ano cuns mínimos de calidade", explica Sánchez.

Ademais, supón poñerse á altura das 160 universidades máis prestixiosas do mundo, das que menos de vinte son europeas.

iTunes U ten dous anos de experiencia

A compañía norteamericana Apple adaptou en maio de 2007 o seu almacén audiovisual iTunes para a comunidade universitaria creando iTunes U, que permite compartir contidos educativos consultables en PC, Mac, PDA, iPod ou iPhone. Nun principio, só estaba dispoñible para entidades de EEUU e Canadá e, pouco a pouco, foise abrinco a outros países europeos, como Reino Unido, Alemaña ou Francia.

Fai uns meses, ofertou o seu servizo a España e a universidade de Vigo foi a primeira en superar os controis de calidade. Está previsto que en breve entren dúas entidades españolas máis.