Feijóo obvia o software libre no seu plan tecnolóxico

“Traballar sen papeis”. Este é, en palabras do presidente da Xunta, Alberto Núñez Feijóo, o obxectivo do “Plan de Medidas Urxentes no ámbito das tecnoloxías da información e da comunicación” ao que o Goberno galego deu onte luz verde definitiva.

Cun investimento total de 8 millóns de euros ata finais de 2010, o plan aposta por lograr que boa parte das operacións administrativas da Xunta, tanto internas como as realizadas polos cidadáns, poidan canalizarse a través de Internet.

Ao tempo, explica o presidente, este proxecto “centralizará as compras” de equipamentos informáticos no seo da Administración autonómica para “optimizar o gasto en tecnoloxía nun marco de austeridade e mellora na eficiencia dos fondos”.

Esta iniciativa, explica Feijóo sumarase a outras que, nas vindeiras semanas, tratarán de paliar as carencias informáticas no ámbito da Xustiza

Neste escenario, este proxecto suporá o primeiro paso para elaborar un “Plan Estratéxico Global” na materia que todo semella indicar que estará chamado a substituír ao “Plan Estratéxico Galego da Sociedade da Información” (PEGSI), elaborado polo Goberno bipartito.

Precisamente un dos piares dese plan, a promoción do software libre –isto é, cun código aberto que permite adaptalo ao funcionamento da Xunta sen necesidade de adquirir e renovar licenzas mediante pagamento–, é obviado pola Xunta na presentación do seu plan.

Do mesmo xeito, se ben o Goberno galego avoga por “optimizar os procesos de licitación e adquisición” do equipamento informático da Administración autonómica, o novo plan non define o papel do organismo Man Común, creado polo anterior Goberno para o desenvolvemento de programas informáticos de código aberto.