Lou Reed pide marisco de Muros para tocar en Santiago

A estrela de rock estadounidense Lou Reed, que ofrece mañá un concerto en Santiago de Compostela, acompañado da súa compañeira sentimental, tamén cantante, Laurie Anderson, pediu mariscos para comer –“se é posible da ría de Muros”, dixo–, e un especialista en masaxe escandinava, informou onte a organización do evento.

O artista solicitou unha reserva en dous restaurantes do casco histórico, ao que prevé acudir acompañado dun grupo de cidadáns de Nova York, sinalou a promotora deste concerto de concienciación sobre a importancia de doar órganos para transplantes.

Engadiu que ademais requiriu “un detallado menú” que inclúa mariscos, “preferentemente da ría de Muros”, peixes á prancha e viño branco de Ribeiro. En definitiva, un menú completo co mellor da tradición culinaria galega.

Ademais, a organización confirmou tamén a incorporación do teclista Louis Suddarth Calhoun ao cartel deste espectáculo previsto para mañá e que se celebra na praza do Obradoiro da capital galega. O aforo está case completo.