A Mesa recolle firmas para unha plataforma en defensa do galego

A asociación A Mesa pola Normalización Lingüística comezou hoxe a buscar apoios co obxectivo de crear unha nova "plataforma social ou de estrutura cidadá" para dar impulso a unha iniciativa lexislativa popular (ILP) "en defensa do galego" e que garanta "o seu uso ante as Administracións públicas".

Así, durante a asemblea na que máis de 50 representantes de colectivos sociais, políticos e culturais de Galicia debaterán a iniciativa, o vicepresidente de A Mesa, Fran Rei, manifestou que a súa intención é que a plataforma "naza con vontade de pluralidade ou diversidade" e cunhas características similares a 'Nunca Máis' aínda que, recoñeceu, "salvando as distancias".

Por iso, explicou que un dos principais obxectivos da reunión de hoxe será o de "sumar distintas voces e iniciativas que neste momento se están a levar a cabo, ou que se poderán levar a cabo no futuro, en defensa da lingua".

"Estamos a ver como xorden, a nivel colectivo e a nivel individual, iniciativas con persoas coñecidas de diferentes ámbitos, de relevancia, que nos parecen moi positivas e dende A Mesa aspiramos a crear un espazo para unir estas propostas de traballo", sinalou.

Así, a súa proposta -que en principio levaría o nome de 'Queremos galego'- centralízase en "impulsar e divulgar unha iniciativa lexislativa popular para garantir o dereito ao uso do galego ante as administracións públicas" e o seu uso nos poderes públicos.

"Vemos que se están a producir retrocesos graves no ámbito legal, como pode ser a modificación da Lei de función pública ou o decreto do uso do galego no ensino, que ten os días contados", lamentou.

Por iso, considerou "necesario blindar a oficialidade do galego a todos os niveis posibles", e avanzou que levarán a cabo "un traballo moi amplo e moi diverso de rúa, cidade por cidade, para acadar adhesións individuais e colectivas -á ILP-" e, así, "dar a coñecer a iniciativa en se e abrir un debate social" sobre o idioma.

Personalidades

A pesar diso, aclarou que, por agora, "a intención é recoller todas as propostas" e que estas dependerán "das entidades que decidan integrarse" na plataforma.

Entre as máis de 50 persoas de colectivos políticos, sociais e culturais e a título individual que acudiron á asemblea, atopábase o secretario nacional da CIG-Ensino, Anxo Louzao; a cineasta Margarita Ledo; ou a secretaria xeral de Galiza Nova, Iria Aboi.