Barreiro pide a defensa da lingua e un xiro do PP ao galeguismo

“O galeguismo e a defensa e promoción do uso do noso idioma son os piares sobre os que se sustenta o ideario do Partido Popular de Galicia”, asegura o vicepresidente do PPdeG, Xosé Manuel Barreiro.

Nunha entrada publicada recentemente no seu blog o líder lucense reivindica o “compromiso galeguista do que sempre fixo gala” o PP e considérao “irrenunciable” e “un principio non só a manter, senón a potenciar”.

Barreiro di “rexeitar frontalmente esa dicotomía avivada den algúns ámbitos e dende algúns sectores políticos” arredor da lingua que “parecen querer obrigar a elexir entre o galego ou o castelán” e pensa “que todo este rifirrafe é desproporcionado e está fóra de lugar e sobre todo de época”.

O ex vicepresidente da Xunta asegura que é “un plantexamento con trampa” e “alleo ó sentimento maioritario da sociedade galega”.

Barreiro quere “deixar valeira esa estratexia de polarización” que “algúns están a alientar”. Segundo o líder lucense, a obriga a escoller entre galego ou castelán “vén a ser como esa pregunta maliciosa que selle fai ós cativos: a quen queres máis a papá ou mamá?”.

A pesar disto o vicepresidente do PPdeG asegura no seu texto non ter “dúbida de que o executivo galego actuará concienzudamente” para acadar “o maior grao de consenso sobre unha cuestión que é cousa de todos”.

Como contraposición á actual situación reivindica a figura de Ramón Piñeiro como “defensor a ultranza do galego” pero “sempre partidario de despoxalo de calquer bandeira política”.

Nesta cualifica como “un referente a ter en conta” o posicionamento da Real Academia Galega en vésperas do último Día das Letras para “acadar un acordo social integrador” sobre a lingua.

Barreiro remata asegurando que o esforzo do PP “debe estar encamiñado” a lograr “a defensa da nosa lingua como sinal de identidade propio e intransferible”.