‘Queremos galego’, cuarta plataforma a prol da lingua

Xa son catro as plataformas cidadás que, en diferentes ámbitos, se están a organizar en Galicia co obxectivo de mostrar, de xeito organizado, o seu rexeitamento á política lingüística do novo Goberno galego.

Aos tres colectivos que, tal e como adiantou Xornal de Galicia, comezaron en pasadas semanas a artellar diferentes iniciativas en defensa da lingua –dende as orientadas ao ámbito lexislativo ata as que apostan polo ámbito máis lúdico e reivindicativo– sumouse onte a impulsada dende A Mesa pola Normalización Lingüística.

Baixo a denominación ‘Queremos galego’, este novo colectivo agrupara ás en torno a cincuenta entidades que onte, nunha xuntanza celebrada en Santiago, sentaron as bases dunha plataforma que se constituirá como tal o vindeiro día 15, de novo na capital galega.

Estas entidades –entre as que se atopan sindicatos, organizacións políticas, equipos de normalización lingüística, asociacións de pais e nais ou centros sociais–, márcanse como primeiro obxectivo a posta en marcha unha Iniciativa Lexislativa Popular (ILP) orientada á “blindaxe dos dereitos lingüísticos”.

Segundo apuntaba onte a este diario o vicepresidente da Mesa, Francisco Rei, a sesión constitutiva da plataforma terá xa sobre a mesa un bosquexo desta ILP, elaborada por membros do Observatorio de Dereitos Lingüísticos e que dirixirá especialmente a súa atención ao “ámbito da Administración”.

Esta iniciativa, explica Rei, faise necesaria dados os “retrocesos graves” que, dende o seu punto de vista, “se están producindo no ámbito legal, como na modificación da Lei da Función Pública” ou no “decreto de uso do galego no ensino, que ten os días contados”.

Ao tempo, ‘Queremos galego’ aposta por levar o seu traballo “rúa a rúa”, co obxectivo de captar tamén “apoios individuais”.