A Xunta bendice a “inmersión lingüística”, pero en inglés

O aeroporto de Lavacolla recibiu onte 74 alumnos galegos de Secundaria procedentes de Irlanda, onde participaron no Programa de Inmersión Lingüística da Xunta. A súa chegada coincidiu coa partida doutros 114 estudantes na segunda quenda do curso de aprendizaxe. O director xeral de Educación, Formación Profesional e Innovación Educativa, José Luis Mira, que estivo no aeroporto para despedir e recibir os estudantes, explicou que a intención do curso é que os alumnos “convivan con familias noutros países” e, a través desta inmersión lingüística, poidan “complementar as competencias que adquiren na ESO”. Ademais, apuntou que o programa consiste nunha estadía de tres semanas en países estranxeiros, neste caso Irlanda, acollidos por familias nativas e durante a cal asisten a clases de inglés. Así mesmo, realizan outras actividades para divertirse e integrarse, indicou Mira, na “vida social e cultural do país”, o que supón unha “experiencia moi enriquecedora”. O curso de aprendizaxe está financiado pola Consellería de Educación e o seu investimento total alcanza os 4,3 millóns de euros. “É un programa caro”, admitiu o director xeral, pero sinalou que é “do que máis orgulloso” está. As familias, que acceden ao programa segundo criterios de media escolar e renda, só teñen que achegar unha cantidade de 150 euros.