A enquisa avala o equilibrio das linguas oficiais nas aulas

“Reafirma a necesidade de revisar o marco legal”. Esta é a síntese que a Consellería de Educación extrae dos resultados da enquisa aos pais sobre o uso das linguas do ensino cuxos resultados, logo de sucesivos adiamentos, viron a luz no día de onte.

O Secretario Xeral de Política Lingüística, Anxo Lorenzo –encargado de presentar o inquérito nunha comparecencia á que o Conselleiro, Jesús Vázquez, non asistiu–, reafirmou onte a intención da Xunta de derrogar o decreto que regula a presenza do galego nas aulas reducindo á categoría de “unha opinión máis” un estudo que, malia ás eivas denunciadas por expertos na materia, avala o equilibro de idiomas no ensino non universitario.

Atendendo aos datos presentados por Lorenzo, as familias que elixiron as opcións “a maioría en galego”, “a maioría en castelán”, “unhas en galego e outras en castelán” ou ben, no caso de Infantil e FP, selecionaron “as dúas”, sitúase nun 49,8 por cento no conxunto dos niveis educativos. Mentres, os enquisados que optan só polo galego sitúanse no 13,7 por cento e os que prefiren só o castelán, no 36,4%.

A petición de igualdade entre ambos idiomas elévase por riba do umbral do 50 por cento no caso da educación infantil, onde o 53,2 por cento dos cuestionarios reclama a primeira aprendizaxe nos dous idiomas –as familias cubriron unha enquisa por cada fillo– e na Formación Profesional, co 52% dos participantes na consulta.

PARTICIPACIÓN

O responsable de Política Lingüística mostrouse especialmente satisfeito polo grao de participación acadado xa que, aínda que a abstención acade o 41,3 por cento, a chegada á Xunta de 194.125 cuestionarios resulta “moi positiva”.

Con todo, Anxo Lorenzo recoñece que o grao de implicación da comunidade educativa non é homoxénea en todos os niveis educativos –redúcese notablemente nos tramos con alumnos de maior idade– e, especialmente, entre o ensino público e o privado.

Se ben Lorenzo rexeitou ante os medios desagregar os datos por hábitats –a diferenciación de respostas entre cidades e medio rural non é pública– ou centros, si admitiu a “altísima” participación en colexios privados e concertados, mentres que “nalgún” público, os cuestionarios cubertos non superaron o 30%.

No marco dunha multitudinaria rolda de prensa, o Secretario Xeral mostrouse especiamente molesto polas críticas recibidas nas últimas semanas tanto polo adiamento dos resultados como no referido á contratación dunha empresa para procesar os datos da enquisa e o seu custo.

Logo do que Anxo Lorenzo define como “tantas mentiras e estupideces”, Anxo Lorenzo cifrou en 160.995 euros o custo dun estudo no que, di, a implicación dunha compañía privada foi necesaria xa que, di, “un equipo da consellería” tardaría “case un ano” en recontar.

Neste escenario, Lorenzo mostrouse “moi satisfeito” ante un proceso que, afirma, “demostra o fracaso” das “fórmulas de imposición” que, dende o seu punto de vista, estiveron na base da política lingüística do bipartito e que o Goberno galego, di, substituirá por un “decreto plural”.