O músico norteamericano Willy DeVille morre aos 55 anos

O cantante e guitarrista estadounidense Willy DeVille, coñecido pola súa versión mariachi do clásico "Hey Joe", faleceu onte á noite aos 55 anos, segundo anunciou hoxe a empresa Caramba Spectacles, que organiza as súas xiras de concertos.

"Willy DeVille foise para reunirse está noite con Edith Piaf, Jack Nitzsche e Johnny Thunders", sinala nun conciso comunicado a empresa na súa páxina web.

"Para nós, compañeiros de xiras, apaixonados da persoa e da súa música, a perda de Willy DeVille deixa un baleiro insoportable no panorama musical" e "pon fin a máis de 20 anos dunha aventura escénica e humana, chea de praceres e de emocións intensas, únicas", engade a nota.

Aínda que a empresa non precisa detalles sobre as causas do seu falecemento, DeVille sufría dunha hepatite C e dun cancro de páncreas.

Máis apreciado en Europa que no seu país natal, o cantante iniciou a súa andaina musical en Nova York en plena onda do movemento punk e fíxose coñecido co seu grupo Mink DeVille, antes de iniciar a súa carreira en solitario.

Logo de incursións no soul e na salsa, a súa música impregnouse das influencias da tradición de Nova Orleans, onde se instalou nos anos 1990.

O seu último álbum, Crow Jane Alley, apareceu en 2004.