O cambio de cartelería custará 22.000 euros segundo traballo

Unhas horas despois de que se celebrase a rolda de prensa na que os os conselleiros Jesús Vázquez e Beatriz Mato o deron a coñecer o novo logotipo da rede de escolas infantís, a conselleria de Traballo informou de que o cambio de cartelería, excluíndo o imposto de valor engadido, ascenderá a uns 22.000 euros.

Segundo informou a Xunta, a titular de Traballo non facilitou este dato “unicamente por non coñecelo a primeira hora da mañá”.

Igualmente, fontes deste departamento aseguraron que o custo non é tanto xa que “o cambio de cartelería non está motivado unicamente pola variación do deseño corporativo da rede preescolar, senón que a reforma da rotulación era necesaria debido a que, co cambio de Goberno, é un departamento distinto o que se fai cargo deste servizo”.

Por outro lado, a Xunta non quixo desvelar o nome da empresa que se encargou de deseñar o logo da Galiña Azul. A imaxe está inspirada no conto do escritor Carlos Casares pero, non obstante, a idea creativa do debuxo foi realizada por unha empresa privada, que segundo a Xunta xa percibiu os seus honorarios. Custe este do que non se deron datos. Segundo informaron a Xornal de Galicia desde a consellería de Traballo “a política da Xunta establece non dar o nome de empresas que realicen algún servizo para a Administración se non houbo un concurso cuxo resultado fose publicado no DOG”.

Non obstante, e a pesar da falla da información por parte do Executivo galego, Xornal de Galicia puido saber que a firma encargada da imaxe das aulas infantís e a empresa Europublic con sede na Coruña.