Douscentos barcos colapsan a ría de Vigo en contra do porto de Massó

Máis de douscentos barcos de baixura protagonizaron onte unha concentración marítima no Morrazo contra da construción do porto deportivo de Massó na zona de Salgueirón. A instancias da confraría de pescadores de San Xosé de Cangas produciuse a paralización na actividade de lonxas e portos de toda a ría de Vigo. Bateeiros, chalanas e gamelas achegáronse ata a vila para mostrar o seu apoio os mariñeiros de Cangas secundados, a maiores, por máis de 500 persoas en terra que, contando coas dos barcos, sumaron arredor de mil manifestantes.

O momento de maior tensión viviuse tras a aparición dos nacionalistas Bieto Lobeira e Teresa Táboas, aos que o voceiro do Foro Social de Cangas, Tiago Pérez, acusou publicamente de “hipócritas” por se acercaren “soamente para facer a foto”; críticas que foron respaldadas por apupos colectivos dende os barcos e polos manifestantes en terra. Tiago reiterou que se a alcaldesa Clara Millán, do BNG, “quixese realmente paralizar as obras, xa o tería feito”.

Tras máis de hora e media de concentración, os alí reunidos trasladáronse á sucursal de Caixanova para falar co seu director pola presunta orde a unha empresa privada de retirar pancartas situadas por toda a vila que portaban insignas coma “Caixarouba stop Massó”; feito que o patrón maior da confraría de Cangas tachou de “ilegalidade” xa que “se é verdade que vivimos nun país libre, os únicos que poderían retiralas, en todo caso, serían a policía e a Garda Civil”. Tras as negociacións con membros do Foro Social, a entidade bancaria comprometeuse a retractarse no mandato.

AUSENCIA DE MILLÁN

Despois, os manifestantes trasladáronse ata o Concello onde solicitaron a presencia da rexidora Clara Millán, encontro que non chegou a producirse xa que tal e como informou o persoal do grupo municipal, a alcaldesa non se atopaba na Casa do Concello. A negativa foi respostada cun alivión de ovos sobre a fachada do edificio e por berros que esixían a colaboración de Millán.