Desaparece o 'pai' de Shinchan cando facía senderismo

O creador do manga no que se basea a popular serie de debuxos animados xaponesa Shinchan, Yoshito Usui, de 51 anos, está desaparecido desde o pasado venres cando foi a facer senderismo a unha zona montañosa, segundo informou este mércores a axencia nipona Kyodo.

A policía das provincias de Gunma e Nagano (centro do país) búscano nunha zona accidentada desde o pasado sábado, despois de que fose sen compañía a pasear e asegurase aos seus familiares que regresaría aquel mesmo día. Segundo o diario Asahi Shimbun, a policía realizou repetidas chamadas ao seu teléfono móbil sen que Usui responda.

A cidade de Kasukabe, onde reside, adoptou a imaxe de Shinchan como representación da cidade desde o pasado abril, xa que a historia  do neno rabudo e a súa familia transcorre na localidade da provincia de Saitama (ao norte de Tokio).

As aventuras do neno Shinnosuke Nohara en Shinchan, adaptadas á televisión e o cine, teñen un gran éxito en todo o mundo tras ser publicadas por primeira vez en papel en 1990. O personaxe de Shinosuke foi un gran éxito televisivo en Xapón nos 90 e foi dobrado a numerosos idiomas.