Dous detidos nunha nova liorta polo reinicio das obras no porto de Massó

A xeira de onte na vila pontevedresa Cangas do Morrazo volveu traer a polémica, cun novo enfrontamento entre veciños e Garda Civil que tivo como escenario o porto de Massó, na zona do Salgueirón, e que levou a detención de dúas persoas, liberadas a última hora da tarde. Todo comeceu ás oito da mañá, cando uns camións de alta tonelaxe irrumpiron novamente nas obras do porto deportivo, até o de agora paralizadas, para proceder á descarga de toneladas de pedra sobre a ría de Vigo.

Os veciños fixeron soar a voz de alarma e unha trintena de detractores ás obras do proxecto do porto reuníronse para “frear a desfeita”. Convencidos de que “nin unha pedra máis caerá na nosa ría”, os alí reunidos puxéronse diante das máquinas para impedir a tarefa de descarga. Mentres que a empresa constructora asegurou estar a seguir ordes do subdelegado de Goberno, os veciños insistiron no feito de que “existen sinalizacións municipais que impiden o acceso a vehículos de máis de 3,5 toneladas” e que “as obras non contan coas licenzas municipais necesarias”.

"NON SOMOS TERRORISTAS"

Coa chegada de axentes da Garda Civil, a situación atravesou o seu punto máis tenso, no que comezaron a surcar insultos e ameazas dende un e outro bando. Os axentes procederon a identificar os alí reunidos que se defenderon con berros de “non somos terroristas”.

Un dos manifestantes, un mariñeiro de corenta anos, coñecido por Pepe, afastouse do grupo e dispúxose a sacar unha foto da refrega entre policías e veciños. Nese momento, dous axentes vestidos de paisano detivérono. Posteriormente, foi detido o seu irmán Javier, outro mariñeiro do Morrazo que xa fora identificado previamente. Ante os apupos colectivos e a numerosa presenza de membros da Benemérita, comezaron os forcexos e incluso se chegou a ouvir unha ameaza de morte por parte dun dos axentes. Un deles asegurou, por outra banda, que era “a última vez na que se intentaría usar o diálogo”.

Membros do Foro Social de Cangas denunciaron que se “utilicen” as Forzas de Seguridade do Estado para vixiar as obras que se acometen no Salgueirón. Cando os axentes procederon a trasladar os detidos ata o cuartel da Garda Civil, todos os manifestantes decidiron “apoiar” os seus veciños. Ademais, antes de ser levados ao cuartel, os detidos solicitaron pasar polo cuarto médico por motivo dos “golpes” que din ter sufrido por parte dos axentes.

Namentres, polo cuartel pasaron os avogados da confraría, o propio patrón maior, Evaristo Fernández e o concelleiro de urbanismo de Cangas, Mariano Abalo. Este último, denunciou a “virulencia e brutalidade” que, ao seu xuízo, houbo na actuación das forzas de seguridade, destacou que os arrestos se efectuaron cando “a cousa estaba xa tranquila”.

Así, afirmou que “parece que había orde de facer detencións” e recordou que os camións “estaban a vulnerar” a prohibición que marcan os sinais de tráfico instalados. Pola súa banda, dende a alcaldía aseguraron que, pese o convencemento popular, “a alcaldesa non ten competencias para parar as obras”.

As sete media da tarde os detidos foron liberados e xunto a toda a comitiva que os agardaba ás portas do cuartel, dirixíronse novamente ao Salgueirón, onde tivo lugar unha asamblea a prol da paralización dunhas obras que, ao seu xuízo, conforman “un dos maiores pelotazos urbanísticos en Galicia”.