A competencia do Sá Carneiro para Galicia

Xosé Sánchez Bugallo explicaba onte na súa comparecencia ante os medios de comunicación o “perigo” que representa o aeroporto do Sá Carneiro para os tres aeródromos de Galicia e aseguraba que moitos turistas procedentes de América chegan en voos directos á terminal lusa. Foi entón cando o rexedor socialista contou unha anécdota para reflectir a situación actual: varias persoas contáronlle que viran aos ciclistas do Xacobeo Galicia en Porto para coller o avión para participar na Vuelta a España, que partía dende Holanda, no circuito de Assen, é “a Xunta paga os billetes”. Dende o equipo de ciclismo que dirixe Álvaro Pino explicaron a Xornal de Galicia que foi unha petición dos propios deportistas, xa que así facían un voo directo ao seu destino e, ademais, moitos dos integrantes do equipo viven no sur da comunidade autónoma, polo que preferían desprazarse ata Porto.