'Pachi' denunciará a conexión galega do 'caso Gürtel' aínda que "reciba ameazas" do PPdeG

Un día despois de que o Tribunal Superior de Justicia de Madrid (TSJM) decretase o levantamento parcial do segredo sumarial sobre o sumario do Caso Gürtel, a vertente galega da trama corrupta e da suposto financiamento ilegal do PP continúa a ser fonte de treboada política.

Logo de que o presidente da Deputación de Pontevedra, Rafael Louzán decidise respostar as informacións que o vinculan á trama advertindo da posibilidade de sacar á luz “adxudicacións a dedo” da etapa do secretario xeral do PSdeG, Manuel Váquez, na Consellería de Medio Ambiente, o propio líder socialista reiterou a “implicación” dos conservadores galegos no caso.

“Van mal –di – se pensan que ameazándome non imos denunciar o que están facendo”. O socialista lembra que “non é o PSdeG, senón a Policía” quen “abre unha caixa forte de Pablo Crespo en Pontevedra” e revela “que no 2001 Louzán contrata unha sondaxe” con Special Events.

No mesmo sentido, apunta Vázquez que a trama tamén “implica directamente” ao presidente do PP da Coruña, Carlos Negreira quen, segundo o informe do Consello de Contas de 2004 e posteriores dilixencias da Fiscalía, cometeu “irregularidades na xestión” como presidente de Portos de Galicia ao adxudicar obras a Constructora Hispánica, cuxo propietario foi imputado no caso Gürtel.

‘Pachi’ Vázquez reitera a súa intención de esixir no Parlamento “que contrataron, canto e como pagou” a Xunta, “con Feijóo como conselleiro” e con Pablo Crespo –número dous da trama e ex secretario de organización do PPdeG–”como vogal do Consello de Portos”, un posto do que, lembra, “marchou porque o PP perdeu as eleccións , non porque o botase Feijóo”.

“Nós –conclúe– falamos de política, aínda que ao PP gústalle máis mandar oito aprendices de matóns á miña casa –en referencia á manifestación de Nuevas Generaciones, o pasado domingo ante a vivenda do líder socialista–, que só lles faltaba a camisa azul para virme buscar”.

As ramificacións en Galicia da trama Gürtel son tamén seguidas con atención dende Valencia, onde o voceiro socialista nas Cortes da comunidade, Ángel Luna, observa a Feijóo “preocupado” ante o rexurdir da relación entre o PPdeG e a rede de financiamento corrupto.

“Pode dar a sensación –di Luna, en declaracións a Xornal– de que o que acontece coa trama en Valencia é a posta en práctica do que antes se ensaiou en Galicia, con facturas pendentes, adxudicacións públicas e empresas que realizan eventos para o PP”.