Os socialistas din que Feijóo licita cinco veces menos que o bipartito

O portavoz parlamentario do PSdeG, Xaquín Fernández Leiceaga, criticou onte o baixo nivel de licitación da Xunta de Núñez Feijóo, ao que acusou por facer unha política de “parálise e revancha” en vez de “asumir que ten que empezar a gobernar”. O deputado dos socialistas comparou as cifras de licitación deste Goberno coas do bipartito e calculou que “as do actual son cinco veces inferiores”.

Leiceaga cifrou en 100 millóns de euros a licitación de obra pública por parte do Goberno galego “en cinco meses” e comparouna coa actuación do bipartito, que licitaba “un pouco máis de 100 millóns de euros de media mensual”. Calculou entón que se esta tendencia se prolonga ata final de ano, haberá “un déficit de licitación” de 750 millóns.

A maiores, indicou que nestes días se coñecerán os datos do paro e advertiu de que, se se produce “un agravamento” da situación, os socialistas levarán esta cuestión ao Parlamento. “Feijóo non poderá mirar para outro lado nin sinalar a outra administración”, dixo.