Os programas máis afectados son os da Fundación Calidade

Os traballadores da Fundación Calidade vencellados a proxectos tecnolóxicos que teñen que ver co Plan Galego da Sociedade da Información e co Plan Galego de I+D+i (incite) teñen unha casuística laboral moi variada Así, a diferenza dos do Centro de Supercomputación de Galicia (Cesga) non en todos os casos se precisa a data de finalización dos seus contratos. Porén, a maioría deles recibiron unha carta na que se confirma o 31 de decembro como a data final da súa relación laboral coa Administración.Como consecuencia destes despedimentos, desaparecerían servizos impulsados polo bipartito como o Observatorio Galego da Sociedade da Información (OGSI), diversos programas de I+D+i como o IMAN –adicados a tratar de evitar á fuga de cerebros–, de apoio ás empresas ou de busca de financiación na Unión Europea. Entre os servizos máis afectados estaría a Rede de Dinamización da Sociedade da Información, o que deixaría sen atender a máis de 45

telecentros ubicados en distintas comarcas do país. Até o momento, só se produciron 14 despedimentos, sete deles en Mancomún e outros proxectos do PEGSI, aínda que a Administración segue a desmentir que pensara desmantelar o proxecto, que nacera no ano 2005 baixo a estrutura da Consellaría de Innovación. O obxecto era introducir programas de software libre na Administración. O seu deseño estrela foi o Galinux, un sistema operativo en galego que permitía facer un uso do ordenador completo –internet, ofimática, vídeo e audio– sen necesidade de ter que mercar outros programas. As súas vantaxes foron recoñecidas en repetidas ocasións por diferentes representantes do ámbito industrial e político.