A Xunta perderá dous millóns de euros ao desmantelar Mancomún

A Xunta de Galicia perderá dous millóns de euros coas restructuracións acometidas no Centro de Referencia e Servizos de Software Libre (Mancomún). Un total de 500.000 teñen que ver con contratos que deixarán de xestionarse con pequenas e medianas empresas (pemes) e un millón e medio cun proxecto europeo que a Administración galega non chegou a tramitar, segundo explicou onte en Santiago o ex coordinador da iniciativa, Suso Baleato, durante unha rolda de prensa.

Tanto Baleato como algúns membros da comunidade de usuarios de estándares abertos consideran que o Goberno galego podería reducir este proxecto, que se encargaba até o de agora de organizar eventos, da tradución de aplicacións ao galego e de poñer en contacto a todas as redes de programadores de Galicia, a un simple portal web.

“Non se entende este desmantelamento dos proxectos tecnolóxicos cando, precisamente, a tecnoloxía actúa nunha crise de xeito anticíclico, permite xerar tecnoloxía e postos de traballo”, sinalou Baleato. O ex coordinador de Mancomún ?–afectado polos despedimentos nas fundacións tecnolóxicas da Xunta que deron comezo o 15 de setembro con 14 rescisións de contrato que a CIG califica de improcedentes e que se prolongarán até o 31 de decembro coa non renovación de máis dun cento de técnicos en I+D+i– recordou que o Centro de Referencia e Servizos de Software Libre foi a “iniciativa que máis repercusión tivo no exterior porque foi recoñecida pola ONU e a Comisión Europea” pola súa labor.

Ademais, lembrou que o presidente da Xunta de Galicia, Alberto Núñez Feijóo, que prometera durante a campaña electoral apostar por estes modelos, vén de aboar, precisamente, dous millóns de euros á multinacional Microsoft.

Alexandre Prieto, voceiro da Ciberirmandade, comunidade adicada á tradución ao galego de software libre, insistiu na importancia de que a Administración secunde estes proxectos. “Poden sobrevivir sen apoio, pero é fundamental”, dixo. As comunidades de usuarios e moitos programadores a titulo individual xa viñan adaptando ao galego estes compoñentes, pero, cando é algo masivo, coma no caso do Openoffice, Firefox ou Mozilla, Prieto considera que é moi importante ter axudas públicas. “Sempre fomos críticos e dixemos que Mancomún tiña que ser unha coordinadora e non acaparar recursos porque tiñamos medo de que pasase algo así, que o desmantelaran cando estaba facendo un papel magnífico”, asevera.

A Xunta suprimiu as partidas orzamentarias para o desenvolvemento de estándares abertos e proxectos de innovación a través das fundacións tecnolóxicas.