Un catedrático galego di que se podería autorizar militares a bordo

O catedrático de Dereito Internacional da Universidade da Coruña (UDC), José Manuel Sobrino, considerou hoxe unha "escusa formal" que o Ministerio de Defensa non permita enrolar militares a bordo dos buques atuneiros que faenan en augas do Océano Índico apelando á ilegalidade desta medida.

"Se o marco legal non o permite o propio é modificar e revisar o marco legal para facelo posible", asegurou en declaracións a Europa Press para reiterar que esta é "unha cuestión de urxencia". "Eses cidadáns precisan da protección do Estado español, non dunhas milicias privadas, senón dunha forza española actuando de forma regular", sentenciou.

Todo, malia que Sobrino asegurou descoñecer a base legal na que Defensa fundamenta a súa argumentación. "Os pronunciamentos das nosas autoridades son excesivamente vagos", afirmou en referencia ás declaracións realizadas pola ministra, Carme Chacón.

Nesta liña, reiterou que o traslado de efectivos militares españois se fai "continuamente" en diversas operacións en distintas zonas do mundo. "Hai que acudir ao Parlamento en todo caso se quere un respaldo constitucional e que o Parlamento autorice a dotación de efectivos para cumprir esta misión", resolveu.

Este experto recordou que os tripulantes dos atuneiros que faenan no Índico son obxecto dunhas ameazas "reais" e "verificables", ao tempo que insistiu en que "poden ser protexidos con relativa facilidade". Por iso, instou o Executivo central a "buscar fórmulas" ao igual que fixo Francia e entendeu que, pola contra, a actuación do Goberno central constituirá "unha renuncia de autoridade e de funcións".

"Estes buques non son hoteis de luxo, pero están acondicionados e poderían permitir a presenza dun pequeno efectivo militar a bordo", defendeu. "Se houbese unha barreira legal penso que o Ministerio non actuou coa axilidade que esixe o problema", engadiu ao soster que era previsible un caso como o secuestro do 'Alakrana' porque "eses 30 barcos faenan nunha zona que está loxicamente ameazada con relativa facilidade por estes piratas profesionais".

¿PROBLEMA PRESUPOSTARIO?

O catedrático de Dereito Internacional da UDC cuestionouse se Defensa elude o envío de militares a bordo dos atuneros do Índico polo custo económico derivado desta actuación. Nese caso, remitiuse ao protocolo subscrito entre o Goberno francés e os armadores galos, polo que estes últimos se fixeron cargo dos gastos derivados da presenza dos militares nos buques.

De igual modo, descartou que a medida supuxese "abrir a caixa de pandora" ao sinalar que sempre se podería adoptar unha norma que definise e limitase a intervención dos militares en función das condicións dadas. "Eses barcos levan pavillón español e están baixo a xurisdición do reino de España, corresponde ás súas autoridades garantir a súa seguridade", resolveu.

Respecto á posibilidade de que os armadores dos atuneiros recorran á seguridade privada, este experto preguntouse qué compañía ten capacidade "nestes momentos" para enrolar a catro ou cinco axentes "con instrución militar e capaces de manexar un determinado armamento que impida o asalto ou sexa disuasorio fronte ás armas que son relativamente sofisticadas destes piratas profesionais".

"É irreal, ¿de onde sairían máis de 100 persoas destas características nestes momentos", insistiu, tras recordar que os armadores pagan impostos que á súa vez se dirixen a financiar as Forzas Armadas.