O Comité de Bioética respalda o aborto aos 16 sen permiso paterno

O Comité de Bioética de España, un organismo de carácter consultivo e independente adscrito ao Ministerio de Ciencia e Innovación, fixo público onte un informe no que respalda a reforma da Lei do Aborto proposta polo Goberno. Apóiaa en todos os termos, incluída a potestade que se lles recoñece ás mozas de 16 e 17 anos, menores de idade, de interromper o seu embarazo sen consentimento dos pais.

O informe explica que “é unha medida razonable porque non lle impide á menor acudir aos pais en demanda de consello ou axuda, pero evita que os proxenitores poidan impoñerlles unha determinada decisión”. Así e todo, o Comité de Bioética puntualiza que habería que informar “obrigatoriamente” os pais en caso de “grave risco” para a vida da moza.

Once dos doce membros do comité asinaron o informe, que considera que “a opción pola ampliación da interrupción voluntaria do embarazo é a que lle convén a un Estado laico e neutral fronte ás discrepancias derivadas das distintas crenzas dos cidadáns”.

PLATAFORMA GALEGA PRO ABORTO

Tamén onte se presentou en Santiago de Compostela a nova Plataforma Galega polo Dereito a Decidir. Nela agrúpanse actrices, escritoras, sindicalistas, médicas e profesoras, entre outras profesionais, co obxectivo de reclamar unha nova lei que garanta a interrupción voluntaria do embarazo na rede do Servizo Galego de Saúde (Sergas) e de esixir que se despenalice o aborto.

A plataforma aprobou un manifesto no que recoñece a autonomía das mulleres de 16 anos “para decidir sobre a súa maternidade”. Defende “o dereito á saúde sexual e reprodutiva, á maternidade libre e responsable e a un aborto seguro”, e apoia a lei de prazos de 14 semanas. Esixe tamén a protección da intimidade e confidencialidade das historias clínicas das mulleres e unha regulación da obxección de conciencia para que “non poida ser invocada de forma colectiva” nos centros de saúde.