As promesas de continuidade non se concretan en realidades

O conselleiro de Presidencia, Alfonso Rueda, insistiu no Parlamento en que a Xunta vai seguir apoiando o ‘software’ libre e as diferentes liñas de investigación e desenvolvemento no campo das tecnoloxías da información e a comunicación. Asegurou, por exemplo, que “se están renovando os convenios coas universidades e centros para a investigación”. Porén, os responsables destes servizos non teñen constancia de que iso esté a pasar. Polo momento, aínda queda marxe para a renovación, no caso das Oficinas de Software Libre universitarias que, por outra parte, contan co respaldo económico das entidades educativas. Rueda asegurou que a Xunta vai “achegar o ‘software’ libre ás pequenas e medianas empresas, licenciar como ‘software’ de portas abertas o desenvolto con fondos públicos e que sexa propiedade da Xunta, utilizar documentos baseados en estándares abertos como política de goberno e coordinar accións formativas para a sociedade e as empresas”, entre outras medidas. Todo isto, ata o de agora, non se ve reflectido en ningunha partida orzamentaria concreta ou mesmo nun plan ou proxecto que se comunicase ás partes afectadas. Por iso, tanto os empregados que ven como se achega o remate dos seus contratos, como os sindicatos, como os partidos da oposición, temen que a Xunta reduza á mínima expresión as políticas para o desenvolvemento da sociedade da información. Un traballo que, segundo Ana Bouza, do BNG, tivo un “éxito incontestable co Bipartito”. “En apenas dous anos –dixo–, alfabetizouse dixitalmente a 26.000 persoas, atraéronse novos talentos científicos evitando a fuga de cerebros, o 10% das empresas usan ‘software’ libre e o seu uso triplicouse nas escolas”.