O ministro Caamaño sumouse á multitudinaria manifestación a favor do galego

Foi un éxito da sociedade civil de Galicia. O idioma propio deste país, o galego, ten quen o queira e todo ten unha explicación. O PP alcanzou a Xunta tras apoiarse en plataformas contrarias á normalización lingüística como Galicia Bilingüe e ao chegar a San Caetano comezou a tomar medidas que dende a oposición e institucións como a Real Academia Galega foron entendidas como un “proceso de eliminación da lingua”. Entre outras, xa case non hai escolas infantís en galego nas cidades, este non é obligatorio para acceder á función pública e falta o decreto do ensino, do que se teme o peor. Pois ben, milleiros de persoas plantaronlle cara a Xunta de Feijóo en defensa do idioma propio de Galicia.

As primeiras impresións apuntan a que a protesta de hoxe superou a do Día das Letras Galegas, a maior da historia até hoxe a prol da lingua propia de Galicia, con, segundo a Policía Local de Santiago, 50.000 persoas na capital galega. "Somos galegos e temos dereito" e "Na Galiza, en Galego" foron algúns dos berros máis populares que se escoitaron polo centro e a zona vella de Santiago até a Quintana, praza que se baleirou e encheu por completo en dúas ocasións.

Polo PSdeG-PSOE participou o seu líder, Pachi Vázquez, acompañado polo ministro de Xustiza, Francisco Caamaño, e os deputados Francisco Cerviño e Xaquín Fernández Leiceaga. Tamén estivo o alcalde de Santiago, Xosé Sánchez Bugallo. Foi o propio Caamaño quen, a preguntas dos xornalistas, puxo voz á crítica socialista contra os plans lingüíticos de Feijóo quen, ao seu xuízo, camiña cara ao intento de facer "desaparecer do mapa" o idioma de Galicia ao poñer "en perigo" normas como a Lei de Normalización Lingüística

Do BNG acudiu a practica totalidade da cúpula dirixente, encabezados por Guillerme Vázquez e Carlos Aymerich e toda a Executiva Nacional. Tamén houbo representacións de Esquerda Unida e TEGA, así como do 'popular' Rafael Cuíña, quen asegurou non ser o "único" militante do PPdeG que participou na mobilización e se mostrou disposto a apoiar "todas" as iniciativas en defensa do idioma.

Do eido da cultura participaron Suso de Toro -entrevistado hoxe a fondo en Xornal de Galicia-, Avelino Pousa Antelo, Teresa Moure, Manuel Rivas, Xurxo Lobato, Bernardino Graña; Andrés Torres Queiruga, Susana Seivane, Manuel Lourenzo, Xurxo Souto e moitos outros. Na parte traseira marchou a Galego Sempre Máis e outros colectivos críticos coa plataforma Queremos Galego pero que comparten moitas das súas reivindicacións.

Queremos Galego critica a próxima derrogación do decreto 124/2007 do galego no ensino; a rede de Galescolas; a modificación da Lei de Función Pública para a eliminación dunha proba de galego nas oposicións ou as axudas á tradución de libros en galego. O responsable da asociación Mesa pola Normalización, Carlos Callón, afirmou que a intención da manifestación é "defender a aplicación dos idiomas e da lei de normalización lingüística, que foi aprobada por unanimidade no Parlamento" de Galicia. "Queremos que Feijoo deixe esa bandeira de odio que levantou contra a lingua galega e retome o consenso", comentou o dirixente da citada asociación e exhortou á Xunta a que "deixe esa política de prepotencia contra o noso idioma". Engadiu que o seu desexo é que haxa "galego no ensino, na educación, nos medios de comunicación, porque é a lingua de Galicia" e considerou que os cidadáns teñen "dereito a vivir no noso idioma".