Carlos Vázquez: “Ou aparece unha cuarta forza ou hai PP para rato”

Ten cabida en Galicia un partido nacionalista de centro? Os últimos intentos non foron moi ben. Non obstante, Converxencia, unha nova formación liderada por Carlos Vázquez Padín (Tui, 1973) ten esperanza. Esperanza e confianza porque dende o partido aseguran que poden chegar “a un 70% da poboación galega”. O primeiro obxectivo é presentarse nas municipais do 2011 e logo dar o salto ao Parlamento de Galicia dentro de tres anos e medio. A barreira do 5% dos votos emitidos non lles mete medo. “Se conseguimos implantarnos non debería ser un problema”, asegura Vázquez Padín.

Por que cre que é necesario en Galicia un partido das súas características?

O mapa político é moi pobre tendo en conta a pluralidade da sociedade galega. Os grupos que están no Parlamento para nada reflicten a pluralidade social de Galicia. Hai unha carencia moi grave e é que non existe un centro democrático galego cun proxecto político que sexa xenuíno defensor do modo de gobernación democrática. Non temos moi claro que, hoxe en día, o PP sexa unha formación democrática, sobre todo cando acabamos de escoitar a Carlos Negreira defender a figura de Millán Astray. O mesmo pasa cos partidos de esquerda. Tanto Bloque como PSOE defenden en determinados momentos a ditadura castrista ou o goberno populista de Venezuela que entendemos como preditatorial. Por todo isto cremos que é necesario unha forza de centro democrática.

Como xorde Converxencia?

O noso é un proxecto a longo prazo. Non comezamos a movernos máis axiña polo resultado electoral, aínda que si nos sorprendeu. Todos somos xente moi nova. Somos un partido pequeno pero temos unha presencia moi homoxénea no territorio.

Defínense como nacionalistas ou galeguistas de centro...

Nacionalismo e galeguismo para nós é sinónimo. É importante aclaralo porque a palabra galeguismo tamén está nos estatutos do PP. Nós usamos esta palabra, respectámola e querémola, pero cremos que convén entrar en explicacións sobre o que é realmente o galeguismo. Por outro lado, non temos problema en identificarnos como nacionalistas. Para ser galeguistas hai que ter un proxecto de país, un proxecto autónomo sen condicionantes de intereses alleos. Tanto PP coma PSOE están moi condicionados por poderes externos e iso non é galeguismo.

Xa houbo experiencias antes de partidos denominados galeguistas de centro que fracasaron.

O primeiro que fixemos ao propor este proxecto foi analizar todos os fracasos reiterados de persoas que intentaron levar adiante un proxecto de centro nacionalista e galeguista. Cremos que as persoas que nucleaban eses proxectos non tiñan no centro nacionalista a súa primeira opción. Eran persoas que xa estaban no ocaso das súas carreiras políticas como Soto e Marfany e que querían buscar un buraco. Está claro que se hai que buscar sitio, ese sitio está no centro democrático, non no independentismo ou noutro lugar. Tamén hai graves problemas de incoherencia ideolóxica. Moitos candidatos non pegan coas ideas que din defender.

Cren de certo que poden ter éxito?

Cremos que hai un buraco. A maioría da xente é de centro. Se atendemos as enquisas, a maioría da poboación síntese tan galega como española, máis galega que española ou só galega. Iso o pensa un 80% da poboación. Se cruzamos todas estas variables vemos que o noso potencial de voto é enorme.

As municipais están á volta da esquina. En que concellos se presentarán?

Estamos traballando. Eu mesmo penso presentarme a alcaldía de Tui e temos contactos en Foz, Sarria, Muros, Verín e Ourense cidade. Polo momento estamos nunha etapa inicial.

Aspiran a entrar no Parlamento de Galicia nas próximas autonómica, pero para iso necesitan, a lo menos, un 5% dos votos emitidos.

Se estamos dicindo que temos un público obxectivo do 70% da cidadanía, o 5% do Parlamento non nos mete medo. Ou entra unha cuarta forza política na escena do espazo central ou hai PP para outros 15 ou 16 anos.