Rueda elude aclarar o futuro dos audi que non vendeu

No marco dun pleno no que os grupos da oposición se viron, por secunda vez, capaces de acurralar ao presidente da Xunta –e mesmo intercambiaron aplausos–, o conselleiro da Presidencia, Alfonso Rueda, recuperou parte do argumentario da pasada campaña do 1-M, a acusación de tendencia “ao luxo” dos membros do bipartito, para contestar unha pregunta do socialista José Manuel Lage Tuñas sobre un dos argumentos ‘estrela’ dos conservadores durante a carreira electoral; a xestión do parque móbil da Xunta. Despois de que, o pasado día 17, o departamento de Rueda non fose quen de vender máis ca 3 dos 20 vehículos que incluíu na poxa organizada no complexo de San Caetano, Lage Tuñas instou ao conselleiro a non “gobernar por capricho” e, no canto de “malvender o patrimonio” da Xunta, empregar os vehículos que non obtiveron saída na subasta. Neste marco, e malia a recoñecer que “estaría encantado con outro resultado” da poxa, Alfonso Rueda eludiu aclarar cal será o futuro dos vehículos –dos que 16 corresponden ao Goberno de Fraga–. Así, o titular de Presidencia apostou por buscar “outras fórmulas” para allear os vehículos, que se poderían incluír, di, na compra de novos coches para “abaratar” as operacións.