A Xunta di “apoiar” a selección galega pero sen financiamento

Apoio sen financiamento. O secretario xeral para o Deporte, José Ramón Lete, confirmou onte que o soporte da Xunta ás seleccións deportivas galegas e, nomeadamente, ao combinado absoluto de fútbol, quedará nun mero respaldo nominal e convertindo así, na práctica, en inviable a súa continuidade no futuro.

Despois de que, nos últimos meses, o máximo responsable do deporte galego –con dependencia orgánica directa da Presidencia da Xunta–, puxese sobre a mesa o “escaso ou nulo valor deportivo” da selección galega e mesmo tildase de “circo” os encontros do combinado impulsados polo Goberno bipartito, Lete esquivou onte, a preguntas do deputado nacionalista Alfredo Suárez Canal, a responsabilidade sobre o futuro do equipo.

Malia á insistencia do voceiro do BNG para que o alto cargo da Xunta respondese “si ou non” ao ser cuestionado sobre os seus plans para os encontros da ‘Irmandiña’ no vindeiro decembro –datas nas que, dende 2005, a selección desputa encontros amigables–, Lete só deu en asegurar que “as seleccións galegas existen e seguirán existindo”. Se ben, a renglón seguido, salienta que “son as federacións as que ostentan a competencia para a organización das seleccións deportivas” de Galicia.

Así as cousas, o secretario xeral deixa á Federación Galega de Fútbol como única responsable da pervivencia duns encontros que, dende a recuperación da selección, foron organizados conxuntamente pola entidade deportiva e a propia Xunta. Neste escenario, Lete asegura que a Federación ten recibido 874.900 euros para esta fin, unha partida económica que, na práctica, corresponde á actividade ordinaria das seleccións autonómicas nas múltiples categorías de diversos deportes, pero non ao combinado de fútbol.

Neste sentido, Lete asegurá que “haberá, hai e houbo partidos das seleccións financiados pola Xunta” para, a continuación, citar a participación de escadras autonómicas en especialidades como taekwondo, halterofilia, golf, petanca ou tenis como mostra de que “apoiamos rotundamente ás seleccións galegas, no ámbito que lles corresponde”.

É precisamente a cuestión económica a que xerou maior disparidade de criterios entre Lete e Suárez Canal e, tamén o argumento básico da Secretaría Xeral á hora de retirarlle o seu apoio efectivo á Federación Galega de Fútbol na organización dos correspondentes partidos.

Amparándose en criterios de “eficiencia e eficacia”, Lete censurou que “dos tres millóns que custaron os partidos en catro anos, 1,2 saíron das arcas públicas”, unha “importante achega” que o gabinete de Alberto Núñez Feijóo non asumirá. A argumentación do alto cargo non convenceu o nacionalista que, pola contra, lembrou que “o primeiro partido da selección “deu superávit”; “se hai unha xestión eficiente –di– os gastos poden ser irrelevantes”.

Neste contexto, Alfredo Suárez Canal ten claro que a Xunta “utiliza o argumento económico” para botar por terra a “defensa da identidade de Galiza” que, di, supoñen os partidos da selección, dentro da “escalada do PP de degradar a identidade colectiva do país”.

O mesmo argumento económico foi o recibido pola Federación Galega de Fútbol que, a través do seu presidente, Carlos Meana, confirmou a Xornal de Galicia que o anuncio da Secretaría Xeral segundo o cal “non financiará partidos amigables que non sexan para preparar competicións oficiais”, caso da selección absoluta de fútbol. Neste contexto, e dada “a situación económica de Galicia”, di Meana, “é complicado poder organizar” o encontro da selección sen apoio público.