O Supremo rexeita que os pais elixan a lingua do ensino

A política de "libre elección" de lingua vehicular no ensino recibe un novo varapalo xudicial. O Tribunal Supremo vén de rexeitar, mediante unha sentenza, a posibilidade de que un pai de Vigo decida que o seu fillo reciba todas as clases en lingua castelá. Segundo o alto tribunal, esa decisión traería consigo unha vulneración da Lei de Normalización Lingüística, así como do Estatuto de Autonomía e da propia Constitución Española.

Esta sentenza xa ten xerado reacción entre os partidos políticos galegos. Mentres que nas filas de PSOE e BNG, a decisión do Supremo vén avalar a política lingüística do bipartito, desbotando o "dereito á ignorancia" dun dos dous idiomas oficiais do país, o PP asegura que a sentenza non contradí medidas como a enquisa aos pais promovida pola Consellería de Educación, ou a promesa de "liberdade lingüística" realizada por Alberto Núñez Feijóo no marco da campaña electoral do 1-M.

Pola contra, os conservadores galegos aseguran que o ditame xudicial concorda coa política lingüística desenvolvida pola Xunta "mentres estivo en mans do PP", ou, o que é o mesmo, avala a Lei de Normalización Lingüística aprobada polo Goberno de Gerardo Fernández Albor, desenvolvida por Manuel Fraga e cuestionada por parte da actual dirección do PPdeG.