Unha nai pode perder a custodia das fillas por escolarizalas en galego

“Perigo para as menores pola problemática relativa á inmersión lingüística en Galicia” ou “inmersión nun sistema escolar en lingua galega, unha lingua distinta á que foron escolarizadas ata o de agora que, alén do ámbito daquela comunidade autónomica, non se aprecia que teña outra utilidade práctica”. Son os principais argumentos que un xuíz da localidade madrileña de Alcorcón esgrime para instar a unha nai viguesa a retornar a Madrid coas súas fillas, de cuxa custodia dispón despois de terse divorciado.

A familia destas menores decidiu, na xornada de onte e a través do Grupo Parlamentario do BNG, sacar á luz o auto xudicial que, en palabras de Manuel López, irmán da nai demandada, cuestiona “o dereito dunha familia a voltar ao seu fogar” por causa do idioma.

Mentres que o voceiro da familia asegura que ambas nenas están “completamente integradas”, tamén no relativo á lingua, na cidade viguesa, o maxistrado observa na decisión materna de trasladarse a Vigo a finais de 2008 “un grave perigo” para a “formación e desenvolvemento integral” das menores, esencialmente, apunta, polo “desarraigo do seu entorno vivencial e social en Alcorcón”.

Ese “desarraigo”, prosigue o auto, “esténdese ao ámbito escolar”, xa que, despois de estar escolarizadas “hai moitos anos no Colexio Amanecer de Alcorcón”, agora “vense escolarizadas –salienta– en centros públicos, en Vigo, con inmersión nun sistema escolar en galego”.

Estas conclusións, apunta o tío das afectadas, chegan despois de que “o xuíz lle pregunte reiteradamente” á maior de ambas nenas que, na altura contaba con 16 anos, “se non ten problemas co galego”, 
unha cuestión á que a menor responde “que para ela nunca supuxo ningún problema”, ao contrario que para o maxistrado que “despois de varios veráns veraneando en Galicia, non entende a lingua galega”.

Así as cousas, Manuel López reclama a intervención das consellerías de Educación e Benestar que “certifiquen a integración total das nenas”, xa que, mentres unha delas está a piques de cursar as probas de acceso á universidade “con exención de proba de lingua”, no caso da menor de ambas, “a súa última nota de galego é dun 8,5”, sinala.