Santiago será en 2010 a sede da Conferencia Sectorial de Cultura

Santiago de Compostela acollerá en 2010 a segunda Conferencia Sectorial de Cultura, o pleno da cal tivo lugar onte en Sevilla, coincidindo coa celebración do Xacobeo e do Ano do Libro e a Lectura en Galicia. Decidiuno onte o pleno da Conferencia Sectorial en resposta a unha petición realizada polo conselleiro de Cultura, Roberto Varela, nunha reunión mantida por representantes autonómicos coa ministra de Cultura, Ángeles González Sinde, o pasado mes de xullo.

Varela asegurou que o Ano do Libro contará cun apoio orzamentario de 2.850.000 euros, cunha programación que incluirá proxectos de animación cultural, congresos e conmemoracións, actividades de promoción e difusión do libro, fomento da lectura e a escritura e iniciativas para a mellora da xestión pública do libro e as bibliotecas.

A traballar no dixital

Na décimo segunda reunión do Pleno da Conferencia Sectorial participaron a ministra de Cultura e os representantes das 17 comunidades autónomas para tratar temas relativos á presidencia española da Unión Europea no próximo ano, así como a posta en marcha de proxectos tecnolóxicos de promoción da cultura.

Neste sentido, acordouse traballar na creación e habilitación de ferramentas web e novas tecnoloxías, o que responde á necesidade de habilitar plataformas de colaboración institucional que permita aos cidadáns acceder máis doadamente ás actividades culturais que realizan as entidades públicas e privadas. Así, a consellería apoiará a adhesión ao portal web España, destino cultural, que integrará a información procedente do ministerio, comunidades e concellos.