Feijóo di que a oposición tenta acadar “na rúa” as súas políticas sobre o galego

O presidente da Xunta de Galicia, Alberto Núñez Feijóo, denunciou onte que “a oposición intenta conseguir na rúa o que non conseguiu nas urnas en materia lingüística”. O líder do PPdeG fixo estas declaracións nunha entrevista concedida a Onda Cero na que recalcou que “a sociedade votou moi claramente e en liberdade” e que “en política non hai un indicador máis claro que o resultado nas urnas”, aínda que aceptou que “todas as opinións son respectables”.

Nestes termos referiuse o dirixente galego á manifestación en defensa da lingua propia do país celebrada o pasado 18 de outubro en Compostela e impulsada pola plataforma Queremos Galego, apoiada polo BNG.

Feijóo insistiu en que “en Galicia hai unha serie de persoas que queren politizar a lingua, o quixeron sempre”. O popular insistiu en que “pretenden facer divisións entre os galegos bos e os galegos malos, os galegos que queren a lingua e os que non a queren. Segundo a súa terminoloxía, os galegos que son máis galegos que españois e os outros, que son exclusivamente españois”. Así, en relación ao decreto do galego no ensino, recalcou que “se a maioría das asignaturas se dan en galego, produciríase un empobrecemento lingüístico”.