AchegArte enche con case cen actos a fin de semana da Coruña

O Kiosco Alfonso, e sobre todo o Palexco da Coruña, comezarán hoxe a recibir representantes de todas as industrias culturais de Galicia, que participan na feira AchegArte, organizada pola Concellería de Cultura, co apoio de 90 colectivos do sector. Manuel Rivas, Luar na Lubre, Berrogüetto, Rubén Ruibal, Nani García, Xosé Tomás, Rivadulla Corcón, Chévere ou María Reimóndez son algúns dos protagonistas da cita.

Será unha fin de semana con case un cento de actividades relacionadas co teatro, a música, o cine, a banda deseñada, a literatura, as artes plásticas e todo o que se pode entender como cultura, ás que o público poderá asistir de balde.

É imposible mencionar todas as actividades que terán lugar nestes dous días, pero no capítulo de destacadas está a de hoxe ás 19.30 no Palexco, na que Manuel Rivas presentará o seu novo libro, unha recompilación de artigos de prensa dos últimos anos baixo o título Episodios Galegos,que aparece poucos meses despois do seu poemario A desaparición da neve.

Tamén e de obrigada asistencia o último acto do día de hoxe, un concerto de Luar na Lubre ás 21.00 horas no Palexco, no que o grupo folk, que vén de reunirse hai pouco tras anos de inactividade, interpretará temas do seu novo disco, Terra de Soños. A medio camiño entre a música e a literatura, celebrarase contra o mediodía unha lectura dramatizada de Aventuras e desventuras dunha espiña de toxo chamada Berenguela, de Manuel María, coa música creada especialmente para ela por Nani García. Hoxe María Inés Cuadrado porá a voz e o Cuarteto Xerión o acompañamento musical.

Xa sen instrumentos, a Asociación de Escritores en Lingua Galega organizará tamén un recital das súas Lecturas compartidas, ás 17.00 na entrada do Palexco. No mesmo edificio, pero ás 13.30, a Real Academia Galega presentará o seu Boletín Extraordinario do Día das Letras dedicado a María Mariño.

No Kiosco Alfonso, ás 18.00 haberá tamén unha representación de danza de Amparo Novas, que bailará o In de Elefante Elegante e o Sí quiero de Entremáns. O cine tamén levará a súa parte, coa proxección das curtas galegas Na distancia, de Víctor Hugo Seoane Rodríguez; A viaxe,de José González Varela; Sobre a morte de Bieito, de Xudit Casas; Camposanto, de Pablo Portero; e Berberecho II, de José Manuel Bazarra, na planta baixa do Palexco.

E será un día moi rico en obradoiros, especialmente de banda deseñada e ilustración. O colectivo Polaqia organizará un ás 11.00; Kohel, un dos autores da revista Retranca, dará dúas sesións ás 16.30 é as 17.30; Xosé Tomás seguirá ás 18.00 e a Asociación Galega de Ilustradores ofrecerá o último ás 19.00. Todos son no Palexco.

Pero AchegArte tamén é un punto de intercambio entre industrias e creadores. Nese eido, destaca hoxe a conferencia de Roberto Brenlla: Libera a túa creación. Licenzas libres e abertas, ás 17.00 horas na planta baixa do Palexco. Estes e outros moitos eventos están no menú para hoxe, pero mañá segue a festa.