AchegArte resiste o mal tempo e remata con 38.000 visitantes

A primeira edición de AchegArte recibiu en dous días 38.000 persoas. Esas son as cifras oficiais que onte á noite facilitou a Concellería de Cultura da Coruña, principal organizadora da feira das industrias culturais galegas que substituiu o Culturgal, abandonado economicamente pola Xunta. Pódense cuestionar, pero non é doado saber cantas persoas pasaron entre o sábado e o domingo polos dous espazos habilitados para a mostra, o Pazo de Exposicións e Congresos (Palexco) e o Kiosco Alfonso, ambos na Coruña.

A concelleira de Cultura da Coruña, María Xosé Bravo, marcárase un obxectivo: que 18.000 visitantes respondesen ao chamado de AchegArte e participasen na única feira dedicada aos produtos culturais galegos e os seus produtores. Sendo así, é claro que as expectativas se superaron. Segundo as cifras, outra volta oficiais, por alí pasaron 20.000 persoas o sábado e 18.000 o domingo. Malia a chuvia, un “éxito”.

Cun orzamento dez veces máis cativo que o que tivo a derradeira edición de Culturgal en 2008, 50.000 euros achegados polo departamento de María Xosé Bravo e outros 18.000 procedentes da Vicepresidencia da Deputación, tamén en mans do BNG, conseguiuse superar o récord de público. O ano pasado foron 37.000; este ano, 38.000. Cifras oficiais.

Logo de que a Consellaría de Cultura anunciase que non apoiaría economicamente a feira por mor da “escaseza” de recursos, unha plataforma cidadá reclamou outro tipo de xestión para Culturgal. Foi finalmente a Concellaría de Cultura da Coruña quen recolleu ese testemuño e, nun tempo récord e coa axuda de voluntarios, logrou poñer en pé a programación. Máis dun cento de entidades, dende editoriais a discográficas ou compañías de teatro, amosaron o seu traballo durante dous días na Coruña. A organización quere que teña continuidade en 2010.