Rueda resta “razón de ser” á folga escolar pola lingua

“Non ten moita razón de ser” . Deste xeito valora o conselleiro da Presidencia, Alfonso Rueda, a proposta lanzada pola plataforma Queremos Galego, segundo a cal a substitución do actual decreto que regula o uso do galego no ensino por outro que “desprotexa” a lingua propia traerá como resultado un “paro xeral” nas aulas de todo o país.

Se ben o número dous da Xunta asegura “respectar” a iniciativa do mesmo colectivo que, o pasado 18 de outubro, xuntou máis de 50.000 persoas en Santiago nunha manifestación para rexeitar a política lingüística da Xunta, Rueda non dubida do carácter “preventivo” desta mobilización que, en calquera caso, afirma, só sería unha resposta ao “cumprimento dun compromiso” por parte do Executivo do PP.

Do mesmo xeito, e na liña do manifestado en días pasados polo secretario xeral de Política Lingüística, Anxo Lorenzo, o titular de Presidencia asegura que “antes de que remate o ano” o novo decreto será unha realidade. O seu obxectivo, apunta, será situarse no lugar da normativa aprobada polo bipartito e que, asegura, “foi declarado non conforme a dereito”.

Así as cousas, Rueda ratifica a intención da Xunta de que no vindeiro curso académico estea xa derrogado un decreto que, en calquera caso, desenvolve literalmente o Plan Xeral de Normalización da Lingua Galega (PXNL), aprobado en 2004 pola unanimidade do Parlamento de Galicia a instancias do Goberno de Manuel Fraga.

Nese documento –cualificado polo actual conselleiro de Educación, Jesús Vázquez, coma un “remuíño de ideas”–, a Xunta comprometíase a garantir que, “como mínimo”, o 50% das materias do ensino non universitario serían impartidas na lingua propia, un requisito idéntico ao establecido polo PP en 2004.

AXUDAS Á NORMALIZACIÓN

As declaracións de Rueda chegaban poucos minutos despois de que, na rolda de prensa posterior ao Consello da Xunta, o propio conselleiro manifestase a vontade do Goberno para “seguir traballando na normalización da lingua galega”, concretamente, a través das axudas económicas aos concellos.

Neste obxectivo, asegura o responsable de Presidencia, enmárcase a sinatura dun convenio coa Federación Galega de Municipios e Provincias (Fegamp) que, por valor de 600.000 euros, “reforza” as iniciativas orientadas á normalización da lingua galega mediante actividades das entidades municipais.