Pascual, en mans de cinco cooperativas ligadas ao PP

Partido Popular de Monterroso, PP de A Pastoriza, PP de Castro de Rei e PP de Touro. Son os partidos nos que militan os líderes cooperativos da sociedade de novo cuño Alimentos Lácteos S.A., creada onte para comprar a factoría de Pascual en Outeiro de Rei. Embite de José Manuel García Ansuar, Eugenio Montero e Arcadio López contra a oferta cooperativa liderada por Feiraco para facerse coa propiedade da planta da compañía castelán despois de meses de incerteza. Ansuar foi concelleiro conservador en Monterroso; Montero é edil en Touro e Arcadio López foi alcalde accidental, tamén do PP, na Pastoriza. Relación de nomes e afinidades políticas que onte provocaron cualificativos de “cacicada” e “escándalo” dentro do sector lácteo galego. Socialistas e nacionalistas coincidiron en sinalar a “intencionalidade partidista” do anuncio e de que a sociedade “é demasiado homoxénea ideolóxicamente”.

Pola tarde, Grupo Leche Pascual informaba nun comunicado que acababa de pechar un principio de acordo con esta nova empresa –que aínda non está inscrita no Rexistro Mercantil– integrada por cinco cooperativas: La Arzuana, Gancobre, Perpetuo Socorro, Mopán e Tierra Llana. Segundo fontes da compañía alimentaria, o contrato é de alugueiro con dereito a compra, que a nova sociedade espera deixar pechado nun “prazo máximo” de dous meses. La Arzuana, que permaneceu con Feiraco dentro da oferta destes últimos para facerse coa factoría, levaba semanas traballando aparte coas outras catro cooperativas e co Igape para acometer a operación. Así o confirmaron a Xornal fontes da sociedade Alimentos Lácteos, que evitaron pronunciarse sobre Feiraco, malia que dixeron que a súa sociedade “está aberta” a novas incorporacións.

MARCA BRANCA

Tras facerse público o acordo de mínimos para pechar a venda da factoría, o xerente da nova empresa, Roberto Casas, e os responsables das cooperativas compareceron en Lugo para aseverar que a súa intención é a de “consolidar” unha marca de leite gallega, malia que “inicialmente” envasarán marca branca. Tres dos representantes das cinco cooperativas (faltou o de Tierra Llana, de Castro de Rei, e o da Cooperativa Nuestra Señora del Perpetuo Socorro, que forma parte de La Arzuana) acudiron para sinalar que a súa intención é a de constituir unha sociedade “viable e de futuro”.

Os cinco grupos cooperativos producen algo máis de 150.000 litros de leite diarios procedentes de unhas 2.000 explotacións leiteiras, dimensións que nin socialistas nin nacionalistas consideran aval para liderar un proxecto de tales dimensións. Non obstante, o conselleiro de Medio Rural, Samuel Juárez, si amosou a súa satisfacción perante o anuncio. Feiraco aglutinaba unhas 24 sociedades cunha capacidade de produción duns 500 millóns de litros. “Quedan por concretar todos os detalles”, manifestou o conselleiro, á vez que sinalou que “a Xunta vai ter, loxicamente, unha actitude favorable”, agregou.

A deputada socialista Sonia Verdes, en declaracións a este diario, recoñeceu: “Francamente, nos sorprende que cinco cooperativas con tan pouca capacidade de produción” tiveran o apoio fronte á oferta de Feiraco que, ao seu parecer, “era a mellor para o sector”. “Ten unha clara intención partidista”, en alusión á afiliación dos líderes das cooperativas.

HOMOXENEIDADE

Nos mesmos termos se manifestou a deputada do BNG, Tareixa Paz, quen apreciou a “homoxeneidade ideolóxica” dos responsables das cooperativas que conforman Alimentos Lácteos S.A. “Alegrámonos de que se resolva o futuro laboral para os traballadores”, sinalou a Xornal, pero cuestionou a capacidade financeira. “Hai certas lagoas, parece que se volven facer as cousas como antes, e volvemos perder a oportunidade de vertebrar o sector lácteo galego”.

En canto aos empregados, hoxe están convocados a primeira hora da mañá a unha xuntanza coa dirección de Leche Pascual. O avogado dos traballadores, Alberte Xullo Rodríguez Feixóo, desvelou: “A dirección de Pascual citounos a unha reunión para as 9.00 horas, pero descoñecemos cal será o seu contido e tampouco nos explicaron os temas que queren tratar”.

Por último, o xerente da nova sociedade adiantou a intención de fixar un “prezo xusto” para o leite, e dixo que “está dentro da lóxica” asinar contratos homologados.