Novo fito do 'Hubble'

O telescopio espacial Hubble captou a imaxe máis afastada do Universo tomada até agora en luz case infravermella. Na imaxe poden verse obxectos tenues e vermellos que se corresponden con galaxias que se formaron 600 millóns de anos despois do Big Band. Nunca antes se viran galaxias dunha idade tan curta. Esta nova visión tan remota fornece detalles sobre como as galaxias medraron no seu periodo de formación, ao principio da existencia do Universo, cuxa orixe se estima entre os 13 e os 14.000 millóns de anos. A imaxe foi tomada na mesma rexión onde a cámara do Hubble HUDF tomou en 2004 a imaxe máis afastada do Universo no espectro visíbel da luz. A nova cámara recolle a luz das lonxitudes de onda case infravermellas, cunha visión máis fonda do Universo.