Pascual abortou o acordo con Feiraco tras reunirse con Juárez en Madrid

A factoría de Pascual en Lugo pasou de estar practicamente en mans do grupo cooperativo liderado por Feiraco ao articulado por catro cooperativas vencelladas ao Partido Popular en apenas 48 horas. E cun encontro entre o conselleiro do Medio Rural, Samuel Juárez, e o presidente do grupo alimenticio, Tomás Pascual Gómez-Cuétara, en Madrid por medio. Así o confirmaron a Xornal de Galicia varias fontes da negociación, que non negaron a “sorpresa” ante o “cambio de rumbo” que experimentou o acordo entre o mércores e este xoves. “O contrato estaba para pecharse, o que pasou en Madrid é outro conto”, condenan.

Segundo puido saber este diario, o pasado mércores ás 17:30 horas Leche Pascual tiña a intención de plasmar nun preacordo que era a oferta liderada por Feiraco –que aglutinaba outras 23 cooperativas lácteas galegas– a que mellor se adaptaba ás súas esixencias, e non a que finalmente resultou gañadora, a recentemente creada Alimentos Lácteos S.A. Unha sociedade, esta última, que aínda non existe como tal xa que non foi inscrita no Rexistro Mercantil. “Pero entón Pascual, o mércores, desaparece dos teléfonos”. Segundo fontes da negociación, a empresa castelán faise ilocalizable durante 24 horas.

JUÁREZ

O xoves pola mañá, día en que Samuel Juárez asinou coa ministra Elena Espinosa un programa piloto de desenvolvemento rural sostible en Madrid, o conselleiro mantivo un encontro, como puido saber este diario, co presidente de Leche Pascual, Tomás Pascual. Esta reunión tivo lugar na Casa Galicia da capital española, e contou tamén coa presenza do director xeral de Produción Agropecuaria da Xunta, José Álvarez Robledo.

“O que alí se dixo non o sabemos, pero cremos que non hai dúbida de que se forza unha marcha atrás nun acordo practicamente pechado” con Feiraco. Ás 16:00 horas do xoves, a cooperativa que liderou o amplo grupo cooperativo para facerse coa factoría de Pascual en Outeiro de Rei recibía a chamada da compañía alimentaria. “Finalmente, escollemos o outro proxecto”, díxoselles ás cooperativas. “Estaban moi ilusionados” co proxecto presentado, lamentan fontes del sector.

O presidente de Feiraco, José Antonio Casais, confirmou que “estivemos negociando ata a última hora”, ata que “decidiron realizar o contrato coa outra oferta”, liderada por La Arzuana. Esta proposta, de cinco cooperativas tamén galegas (ademais de La Arzuana están Gancobre, Tierra Llana, Mopán e Perpetuo Socorro), foi aceptada este xoves, cando Pascual lle comunicou que prefería o seu proxecto para a factoría de Outeiro de Rei. De feito, a sociedade que utilizarán para comandar a fábrica, Alimentos Lácteos S.A., nin sequera figura como tal no listado do mercantil, de maneira que tampouco se sabe a participación de cada unha das partes na mesma.

LÍDERES DO PP GALEGO

As cooperativas que finalmente, e en virtude dun proxecto do que apenas se coñecen datos, están moi vencelladas ao Partido Popular. José Manuel García Ansuar (Mopán) foi concelleiro desta formación en Monterroso; Eugenio Montero (La Arzuana) é primeiro tenente de alcalde do concello de Touro e delegado de obras, servizos e urbanismo do Goberno local; e Arcadio López (Gancobre) foi concelleiro e alcalde accidental da Pastoriza. Malia todo, e respecto das acusacións verquidas tanto por voces sindicais do sector como políticas que condenaron a “intencionalidade partidista” da resolución sobre Pascual, o conselleiro Samuel Juárez aseverou onte que “non cabe falar de política”. “Ao longo de todos estes meses acusóusenos de estar ausentes e non nos implicar na solución do asunto, e agora acúsasenos de intervir e de dirixilo”, lamentou.

O presidente de Feiraco, José Antonio Casais, apuntou que “non tivemos contacto ningún” coa Xunta, e que o executivo galego non informou ás cooperativas de que a venda estaba resolta. Foi só Leche Pascual, como confirmaron fontes próximas á empresa a Xornal, quen se comunicou cun grupo de 24 cooperativas. “Pascual ten todo o dereito de escoller a quen máis pague”, engadiu o presidente de Colaga, Javier Taboada. “Pero o noso proxecto era o máis viable”, lamentou.