Vázquez intenta organizar o partido da selección galega malia o ‘non’ da Xunta

Nin a Xunta de Galicia nin a Federación Galega de Fútbol inclúen nas súas respectivas axendas a disputa este Nadal do partido anual da selección galega de fútbol, que nos últimos catro anos supuxo todo un éxito en canto á participación e afluencia de público aos estadios.

Porén, coincidindo coa marcha do bipartito do goberno autonómico, esta festa do deporte galego perderase este ano, se ninguén o remedia. Tanto a Xunta de Galicia como a Federación alegan motivos económicos. Ademais, o secretario xeral para o Deporte da Xunta, José Ramón Lete, chegou a definir o partido do combinado galego coma un “circo identitario” con “nulo valor deportivo”.

De todos os xeitos, Fernando Vázquez, adestrador da selección galega nas súas anteriores citas, xunto a Arsenio Iglesias, aínda se resiste a que este ano non haxa partido do equipo galego. En vista do escaso interese da Xunta a da Federación por organizar un evento que reuníu 65.000 persoas nas súas catro citas anteriores, Vázquez decidiu organizar o partido pola súa conta. Nos últimos días, o técnico contactou cos xogadores que formaron parte da selección galega nos seus últimos partidos, e incluso se está encargando de buscar un rival de nivel. “Xa falei con algúns dos xogadores. A súa disposición é boa, aínda que, para poder xogar con Galicia, é necesario que os seus clubs os autoricen a facelo”, explicou Fernando Vázquez a Xornal.

Atopar rival nas datas de Nadal tampouco é unha tarefa sinxela, aínda que Vázquez está empregando todos os seus contactos para que o equipo galego poida xogar tamén este ano. Unha das opcións que baralla o seleccionador é falar con Radomir Antic, técnico de Serbia, para ver se é posible que a súa selección xogue contra a galega, aínda que é consciente de que “non é doado”.

Vázquez tamén informou á Federación Galega da súa intención de organizar o partido, na procura dalgún tipo de apoio para poder levar a cabo o seu plan. O presidente da Federación, Carlos Meana, confirma os contactos co seleccionador. “Díxome que quería que a selección galega continuase xogando o seu partido anual. Eu xa lle deixei claro que podía contar con nós para todo o que precise. Iso si, de cartos, nada, porque nós, agora mesmo, non estamos en condicións de financiar ese partido. Pero para todo o demais, xa sabe onde atoparnos”, explica Meana.

“Eu contactei con algúns dos patrocinadores, pero chegamos á conclusión de que agora non é o momento de investir neste partido. No futuro, poderíase recuperar, pero tampouco ten por que ser o ano que vén. Poden pasar varios anos sen que xogue a selección, e que despois volva aos terreos de xogo”, sinala o presidente da Federación.

Tamén o colectivo Siareiros Galegos coñece a intención de Vázquez. “Sabemos que o está a intentar, pero é dificil que lle fagan caso”, di Xosé Viana, voceiro de Siareiros.