O PP aproba o presuposto sen contar coa oposición

O PPdeG sacou onte adiante os presupostos da Xunta para 2010, os primeiros do Goberno de Alberto Núñez Feijóo, co rexeitamento ás 1.397 emendas que mantiveron os grupos da oposición –PSdeG e BNG–, que votaron en contra das contas para o próximo ano.

O debate final dos presupostos galegos non introduciu, polo tanto, ningunha modificación nin no articulado nin nas seccións, aínda que os populares aceptaron, no momento de tratar o proxecto en comisión, un total de seis emendas –cinco do PSdeG e unha do BNG–, que a oposición considerou de pouca importancia na formulación do gasto para 2010.

Os grupos da oposición xustificaron o seu voto contrario ás primeiras contas de Alberto Núñez Feijóo polos “recortes” das prestacións sociais que, ao seu xuízo, introducen e porque “non inclúen unha estratexia clara” para superar a crise económica, malia o elevado incremento da débeda pública. Pola súa banda, o PPdeG cualificounas das “mellores que se poden facer nestas circunstancias”.

COMPETENCIAS

Pola súa banda, o Goberno central aprazou ata xaneiro a comisión bilateral coa Xunta de Galicia, prevista para o día 22 de decembro, debido a “problemas de axenda” do vicepresidente terceiro, Manuel Chaves.

Non obstante, o Goberno galego confirmou que “para evitar que este novo aprazamento supoña un atraso no traspaso de competencias”, a Xunta acordou manter contactos e reunións “fóra da comisión”.