Fermín Bouza: “Ao galego íalle mellor con Fraga, se comparamos con Feijóo”

Durante a súa participación no chat de Xornal.com, CONECTA CON…, o sociólogo e profesor na Universidade Complutense de Madrid, Fermín Bouza admitiu non enteder “que ten a dereita contra o galego. O galego, como o catalán, ten que dar moitos cartos. En Madrid teñen unha admiración enorme por Cataluña, pese a que falen mal”, apostillou.

Fermín Bouza foi moi crítico coa postura do presidente da Xunta de Galicia, Alberto Núñez Feijóo ao respecto da lingua. “Paréceme que Feijóo é o activista máis importante que tivo Galicia contra a súa propia lingua. Non houbo outro gobernante con tanta teima. Non sei por que. Sempre agardo unha autocrítica e un cambio neste home”, dixo. Consultado por un internauta se ao galego íalle mellor con Fraga, Bouza non dubidou en respostar: “Se o comparamos con Feijoo si, claro”.

AS TEORÍAS DE GALICIA BILINGÜE SON CREÍBLES EN MADRID

Fermín Bouza, galego afincado en Madrid, confirmou aos seguidores da conversan on line que na capital do Estado a xente de a pé cre nas teorías catastrofistas de Galicia Bilingüe. “Totalmente. Multiplicado por cen”, dixo.

UTILIDADE NO TRABALLO, UN XEITO DE POTENCIAR O GALEGO

No pensamento de Fermín Bouza, a potenciación do galego viría dada, entre doutras cuestións, pola súa utilidade laboral. “É importante que o galego sexa considerado unha lingua de oportunidades profesionais. Foino uns anos. Agora xa non fai falta coñecer o galego para moitas cousas, así que a xente non o considera útil. Quédase para a vida familiar”, explicou aos internautas na súa participación en CONECTA CON...

Bouza considera que o galego é una “lingua minoritaria e minorizada”. Manifestou a súa idea de que con “datos na man, ningunha lingua (agás o inglés) ten o menor futuro. Pero a vontade humana consiste en destruír as expectativas”, engadiu. Na súa opinión, os medios de comunicación “xogaron un gran papel na ‘anormalización’ do galego. E poderían xogar un gran papel na normalización se quixeran”, matizou.

MIRA AQUÍ TODA A CONVERSA CON FERMÍN BOUZA