Os dixitais non substituirán á prensa, segundo o 50% dos galegos

Preto do 50% dos galegos descartan que os medios de comunicación dixitais vaian substituír a prensa escrita, segundo unha enquisa elaborada pola empresa viguesa Mundinova Consultores de Comunicación.

Segundo o sondeo Estudo de Opinión da Sociedade Galega sobre Hábitos e Curiosidades no Uso da Prensa, máis do 52% dos cidadáns, a noticia que máis lles gustaría ver publicada é “a da final da crise, o descenso do paro e o crecemento económico”.

Máis do 90% dos cidadáns enquisados por Mundinova opina ademais que a calidade da prensa é “moi boa, boa e razoábel”. De feito, outorgan aos seus contidos unha credibilidade e fiabilidade maior que aos contidos doutras canles, como os diarios dixitais.