Baltar Pumar dá por segura a vitoria do seu fillo en Ourense

O presidente do PP en Ourense, José Luis Baltar Pumar, asegurou hoxe non ter "pánico á votación secreta" do XV Congreso provincial, que se celebrará o día 30 de xaneiro, posto que as adhesións ao seu fillo e candidato a sucederlle, José Manuel Baltar Blanco, "superan xa o 50 por cento".

  Nunha entrevista na Cadena Cope, recollida por Europa Press, o líder popular mostrouse convencido de que "o 99 por cento" dos que apoian a Baltar Blanco son "consecuentes" co seu compromiso e augurou "máis desercións" nos que avalan ao rival do seu fillo e alcalde de Verín, Juan Manuel Jiménez Morán. "Os seus apoios son moi presionados, con ameazas e chantaxes dende hai moito tempo", denunciou.

  Na súa intervención, sinalou que o día de hoxe -cando se elixen os compromisarios das nove localidades máis poboadas da provincia e a propia cidade de Ourense- "non é decisivo" porque na actualidade as adhesións a favor de Baltar Blanco "superan o 50 por cento" do número total de compromisarios (1.212), polo que os apoios obtidos no día de hoxe "sumarán esa cantidade para superar amplamente ese 50% que fai falta para gañar o congreso".

  Por último, Baltar Pumar mostrouse convencido que Jiménez Morán obterá os avais necesarios para chegar á votación no conclave popular pero advertiu que "para gañar fai falta máis do 50 por cento". Así mesmo recalcou que o "amplo" apoio obtido na elección nos municipios de menos de 5.000 habitantes a semana pasada "foi o esperado". "Sabiamos qué Concellos ían fallar e con cáles contabamos", concluíu.

  Neste sentido, o barón 'popular' incidiu en que el "non ve" onde pode estar "ese 42 por cento que afirma ter o señor Jiménez Morán analizando Concello por Concello ou compromisario por compromisario". De feito, acusou a Morán de "facer mala política", convencido de que o alcalde de Verín "quere sementar unha dúbida nos electores de que ten o que non é certo". "Non pasa dun 4 ou 5 por cento nos Concellos de menos de 5.000 habitantes", incidiu.

"Fraco Favor"

Por último, Baltar Pumar sinalou que o voceiro do PPdeG, Antonio Rodríguez Miranda, fixo un "fraco favor" ao PPdeG e ao seu presidente, Alberto Núñez Feijóo, ao manifestar que Jiménez Morán é un home de confianza de Núñez Feijóo.

  "O que era Rodríguez Miranda xa sabíao eu dende hai moito tempo", incidiu e advertiu de que "cada un responde das súas accións", aínda que "ten a liberdade de facer o que queira". Non obstante, afirmou ter as "súas dúbidas" de que facer estas declaracións como voceiro do PPdeG "sexa honesto e eticamente bo neste instante".