A Mesa ve na mobilización do ensino un "punto de partida" ata que o decreto sexa "retirado"

O presidente da Mesa pola Normalización Lingüística, Carlos Callón, advertiu hoxe de que a manifestación celebrada en Santiago contra a proposta lingüística da Xunta foi "o punto de partida" e sinalou que se convocarán "as mobilizacións que se teñan que realizar", ademais de instar ao conselleiro de Educación, Jesús Vázquez, a "demitir", xa que "non lle queda outra saída".

En rolda de prensa, Callón destacou o "clamor unánime" en defensa do idioma de máis de 30.000 persoas que percorreron as rúas da capital galega, co apoio "de todas as entidades representativas" no ensino, para reclamar que se manteña polo menos un 50 por cento de presenza do galego no idioma de impartición das materias.

Con este fin, explicou que a súa entidade ofrece a disposición da sociedade un modelo de documento para presentar alegacións en relación coas bases para a elaboración do decreto do plurilingüismo e para solicitar "a aplicación real e efectiva" do decreto 124/2007 e do Plan Xeral de Normalización Lingüística.

"Temos a convicción de que este decreto o imos tombar", destacou Callón, para destacar que "a inmensa maioría dos estudantes apoiaron o paro de onte" nas aulas, ademais do "profesorado ". "A realidade non lle corresponde cos datos da Xunta ", aclarou.

Ademais, ante as críticas do PPdeG nas que o partido afirmaba a xente secundou a mobilización "coaccionada", Callón considerou "un desatino" o devandito posibilidade e "que o coloca--ao PP-- como un partido máis extremista". "Non merecemos este Goberno", concluíu o voceiro da Mesa.