Atacan cun artefacto a vivenda do catedrático Blanco Valdés

A vivenda do catedrático de Dereito Constitucional da Universidade de Santiago e articulista de opinión, Roberto Blanco Valdés, sufriu durante a madrugada de onte un ataque cun artefacto explosivo de fabricación caseira que provocou algúns danos materiais no garaxe e no acceso ao xardín da casa.

A Policía Nacional investiga a orixe do explosivo, que estoupou pasadas as tres da madrugada, estaba composto por varios foguetes e unha bombona de camping-gas, cuxa detonación provocou un forte estrondo na veciñanza.

Segundo informa Europa Press, xunto aos restos do artefacto foi posible atopar panfletos esparexidos polo chan, nos que se criticaban as opinións do profesor e colaborador do diario La Voz de Galicia en materia lingüística. “O ton do texto e a reivindicación” incluída nas volantinas, nas que non se incluían sinaturas nin siglas, leva a Blanco Valdés a atribuír o acontencido á man de “grupos independentistas radicais” cuxo obxectivo, lamenta, “é que deixe de dar a miña opinión”.

O catedrático cursou ante as forzas de seguridade a correspondente denuncia, do mesmo xeito que, apunta, aconteceu despois de que, o pasado novembro, localizase no seu xardín un cóctel molotov e, días despois, uns descoñecidos provocasen con líquido inflamable o incendio dunha roda, tamén nas inmediacións da súa vivenda.

REPULSA DE FEIJÓO E DA PRENSA

O presidente da Xunta, Alberto Núñez Feijóo, lamentou onte “profundamente” que “haxa persoas que sexan atacadas” por “defender unhas ideas” ou polo feito de “expresar en liberdade o que pensa”.

Tamén as Asociacións da Prensa de Santiago e da Coruña expresaron onte o seu rexeitamento contra unha “accción intimidatoria que atenta contra a liberdade de expresión”.