O novo decreto estará en febreiro e cun reparto ao 50% entre galego e castelán

Rematada a rolda de conversas cos distintos sectores afectados polo chamado decreto do plurilingüismo, o secretario xeral de Política Lingüística, Anxo Lorenzo, asegura que a norma estará “lista en febreiro” para ser levada á mesa sectorial de educación. Neste foro será onde, según Lorenzo, se “retocarán puntos” en función “dos consensos que se poidan tecer”.

Segundo explicou nunha entrevista a Europa Press, “se deixará claro” que, mentres non se poida impartir o terzo das materias nun idioma estranxeiro ao que aspira o Goberno galego, haberá “unha repartición igualitaria ao 50% entre galego e castelán de materias e horas semanais”, aparte das materias de lingua. En todo caso, Anxo Lorenzo reafirmouse en que “os principios que están detrás” do modelo proposto “non se van cambiar”, malia recoñecer que “hai críticas practicamente por todo”.

Lorenzo tamén recoñeceu que aínda están analizando “como canalizar” a consulta aos pais para que elixan o idioma no que queren que se impartan as materias aos seus fillos, e que a docencia en inglés será “un proceso gradual, progresivo e incluso voluntario”. Aínda que dixo que no próximo curso escolar xa estará plenamente vixente o novo decreto, falou de aplicar “moratorias” en certas cuestións, como os libros de texto.

“posicións radicais”

Ao seu xuízo, “fóra das posicións máis radicais, que nestes momentos derivaríanse da CIG por unha banda e de Galicia Bilingüe por outra, no resto hai aspectos de crítica construtiva” que están “vendo como atender”.

Pero, con respecto á postura dos grupos políticos di que non hai “ningún tipo de interese” no BNG por pactar “nada que teña que ver coa lingua”, e ve o PSdeG na mesma estratexia “de tentar sacar réditos políticos”. Sobre a postura do PP durante a campaña das autonómicas, e se empregou de forma electoralista esta cuestión, Lorenzo limitouse a dicir: “Prefiro mirar cara ao futuro, o pasado é pasado. Eu non estaba aquí nese momento”.

Tamén xustificou a necesidade de cambiar o decreto actual, aprobado polo bipartito, porque “aspectos da política que hai catro anos pensabamos que se poderían pór en práctica, á vista do debate que se está producindo na sociedade galega, son absolutamente inviables”. Ademais, proclamou que “o galego xa non sobrevive, senón que vive” e advertiu de que “non se pode fiar” a lingua só a ensinanza.

Equipos de Normalización

Pola súa banda, a Coordinadora de Equipos de Normalización e Dinamización Lingüística (ENDL) informou onte de que enviou unha carta a Lorenzo na que lle reprocha a “involución manifesta” nesta materia da lingua e reclámalle “a retirada” das bases do decreto do plurilingüismo e “o mantemento” do texto en vigor.

Así mesmo, denuncian a redución de premios e axudas para os ENDL e a “actitude de desprezo polo patrimonio literario por parte do conselleiro do ramo [Roberto Varela, titular de Cultura]”.