Baltar atribúe aos “políticos” o conflito da lingua

“Un problema artificial que estamos a crear os políticos”. Deste xeito define o presidente da Deputación de Ourense, José Luis Baltar Pumar, o “conflito” xerado en torno ao uso da lingua galega, unha controversia que, a xuízo do histórico dirixente do PP ourensán, “ao 90% da poboación galega lle ten sen coidado”.

No marco dunha entrevista en Radio Nacional de España, Baltar subliñou que, ao longo dos anos, “a convivencia galego-castelán foi harmónica”, unha circunstancia que, en pleno debate sobre o denominado “decreto do plurilingüismo”, debera continuar, dende a perspectiva do político ourensán.

Neste sentido, o ata o pasado mes líder do PP na provincia sostén que a cidadanía aposta por que “se cumpra a lei” nun contexto no que, di, os “futuros cidadáns” deben “saír con pleno coñecemento dos dous idiomas” e, no caso de que nesa formación escolar se inclúa o inglés, apunta, “pois moito mellor”.

Así e todo, o que fora máximo expoñente dun dos sectores máis galeguistas do PPdeG critica tamén as reivindicacións lingüísticas dos “nacionalistas” xa que, asegura, “se empeñaron en que só tiña que habaer galego, e iso non pode ser”.

repercusión do congreso

Despois do congreso do PP de Ourense no que o perfil galeguista do novo presidente, Manuel Baltar, foi unha das claves dos intensos debates, o titular da Deputación afirma que os partidarios do que fora opoñente do seu fillo coma Antonio Rodríguez Miranda ou Rogelio Martínez non están “tocados” no futuro da formación.

Mentres Manuel Baltar dá forma á nova dirección dos populares ourensáns, o seu pai móstrase convencido de que o novo presidente “administrará a vitoria con sentidiño e fará un equipo cohesionado”. Así, di, en referencia aos partidarios de Juan Manuel Jiménez Morán, “os demais teñen moito que facer en postos institucionais e políticos”.

No que atinxe ao seu futuro político, Baltar Pumar asegura que está “disposto a estar” nas listas electorais das vindeiras municipais, sempre e cando “o partido considere que podo servir para algo bo”.