A cultura galega atrae un millón de viaxeiros, o triplo que en 2001

“O turismo cultural é o movemento de persoas debido esencialmente a motivos como viaxes de estudo, viaxes a festivais ou outros eventos artísticos, visitas a sitios ou monumentos, viaxes para estudar a natureza e a arte, o folclore e as peregrinacións, co obxectivo de satisfacer a necesidade de elevar o nivel cultural do individuo”. Con estas liñas, a Organización Mundial do Turismo definiu en 1985 o turismo cultural. Un tipo de turismo que atraeu a Galicia, grazas ao seu patrimonio material e inmaterial, 1.043.829 viaxeiros no ano 2008, dos cales 550.091 procedían do Estado español e os restantes 493.738 do estranxeiro.

Estas cifras poñen de manifesto unha espectacular tendencia á alza das visitas por motivos culturais, xa que sete anos atrás foron tan só 336.834 viaxeiros os que se achegaron á comunidade para coñecer o seu acervo. Dito doutro xeito, en apenas sete anos triplicouse o número de turistas que viaxaron á comunidade chamados pola oferta cultural. Todos eles gastaron en 2008 un total de 218,7 millóns de euros, o que supón o 35% dos 613,4 millóns de euros que achegou o conxunto de visitantes ese ano. Non obstante, os efectos indirectos da presenza destes ensimesmados pola actividade cultural en Galicia procedentes dou­tros lares, implican un negocio de 1.424,28 millóns de euros.

SUPERIOR Á PESCA

Todo este torrente de datos, magnitudes e porcentaxes –que emana do informe O turismo cultural en Galicia, elaborado polo Observatorio da Cultura Galega–, pódese resumir nunha única cifra que dá idea da relevancia deste tipo de turismo para a economía galega: as achegas das visitas con fins culturais significarían o 2,54% do Produto Interior Bruto (PIB). O turismo cultural superaría así o peso no PIB do sector pesqueiro (1,6%) ou da industria química (0,65%).

O informe do observatorio amosa, ademais, datos positivos sobre a permanencia dos visitantes na comunidade e sobre o grao de satisfacción. No primeiro aspecto, o viaxeiro por motivos culturais adoita pasar máis días en Galicia que o visitante xeral, xa que a súa estadía media se fixa nos 5,3 días fronte os 4,6 do resto de viaxeiros. No segundo aspecto, as expectativas dos que se achegan a Galicia polo seu patrimonio cúmprense con gran satisfacción, xa que a valoración medida da estadía sitúase en 8,31 sobre dez puntos. Esa gran valoración tradúcese en que o 52% dos visitantes residentes en España xa estiveran en Galicia con anterioridade. É dicir, quen vén a Galicia, marcha satisfeito e gran parte acaba volvendo.

DESCENSO DO GASTO MEDIO

O gasto medio diario dun viaxeiro do Estado que decide aloxarse nun establecemento hostaleiro de tres a cinco estrelas situouse en 2008 en 110 euros, o cal significa un descenso do 18% con respecto ao ano 2003, no que cada turista gastaba 135 euros. Segundo o estudo, a provincia onde máis gastaron os visitantes foi A Coruña –única provincia que supera a media–, seguida de Pontevedra con preto de 107 euros, mentres que Ourense e Lugo están ao redor dos 94 euros. Precisamente, estas dúas provincias son as que menos turistas aloxados en hoteis de tres ou máis estrelas rexistraron–Lugo recibiu en 2008 38.294 e Ourense, 23.352–. En cambio, os viaxeiros españois prefiren maioritariamente A Coruña –que contabilizou 192.441– e Pontevedra –135.689–. No caso dos visitantes estranxeiros, a caída no seu gasto diario foi dun 38%, ao pasar de 179,5 euros en 2003 a 111, 8, en 2008.

O perfil de visitante estranxeiro responde a unha persoa entre 45 e 64 anos que se aloxa entre dúas e tres noite nalgún hotel e accede sen paquete turístico. Ademais, o 81,5% son portugueses, o 11,2% proceden do resto de Europa e o 7,25% veñen de países americanos.