Tosar, Reixa, Martiño Rivas, Castro... Polo “orgullo de falar galego”

“Hai quen pensa que nos temos que avergoñar, pero nós estamos moi orgullosos de falar galego”. Con este espírito de fondo, a Coordenadora de Equipos de Normalización e Dinamización Lingüística, que agrupa aos docentes de todos os niveis educativos encargados de promocionar a lingua propia nos centros, inicia hoxe unha campaña orientada a “sacar peito” co idioma.

Baixo o lema Orgullosos do noso, orgullosos do galego, o colectivo de mestres contará co apoio de persoeiros do mundo do cinema, o xornalismo e a música para pór rostro a unha acción que, explica o seu voceiro, Miguel Outeiro, trata de sementar ese “orgullo” no só no mundo do ensino, senón “no conxunto da sociedade galega.

Así, o acto de presentación oficial da campaña, esta mañá en Santiago, estará avalado polos que serán protagonistas dos seus videos promocionais, entre os que se atopan actores representativos do audiovisual de Galicia, tanto no cinema coma na televisión, caso de Luís Tosar –recentemente galardoado co Goya ao mellor intérprete–, María Castro, Martiño Rivas, Isabel Risco ou Carlos Ares.

Nestas montaxes de video, que serán difundidas nos centros do ensino e entre o conxunto da poboación, colaboran ademais profesionais da comunicación coma o produtor e cineasta Antón Reixa e a xornalista Belén Regueira. Neles, a perte musical correrá a cargo da gaiteira Susana Seivane.

Con estes vimbios, explica Outeiro que os Equipos de Normalización –aos que o denominado “decreto do plurilingüismo” limita a “equipos de dinamización lingüística”– pretende facer fronte ás propostas da Xunta dende o punto de vista do “orgullo”, algo ao que contribúe, expica, o feito de que o uso do galego se “asocie” a “profesionais de grandísima calidade”, coma os actores participantes na campaña, “que tamén se senten orgullosos” de empregar a lingua propia de Galicia, di.

Xunto ás gravacións protagonizadas por profesionais da escena, o colectivo de docentes apostará tamén pola implicación “de toda a sociedade” a través da elaboración dos seus propios videos.

Trátase, apunta Miguel Outeiro, de que pais, alumnos e mestres elaboren “pequenas historias” nas que a única condición pasa por mostrar o lema da campaña e, con el, o “orgullo de falar galego” na actividade da súa vida ordinaria.

A campaña que os Equipos de Normalización presentarán hoxe en Santiago engádese a accións anteriores coas que este colectivo tentou demostrar que “as linguas suman”, rexeitando así que o uso da lingua galega nas aulas “limite” o castelán ou supoña unha “imposición” para o alumnado que se forma nas aulas do ensino público de Galicia.

Do mesmo xeito, estes mestres responderon ás “bases” do decreto que prepara a Xunta cunha análise “pedagóxica” do texto, na que constaban que medidas como a impartición dun terzo de materias en inglés serían “inaplicables”, e na que defendían o mantemento dun “mínimo” do 50% das horas lectivas en lingua galega.