O PSdeG demanda que se elabore unha nova lei para os medios públicos

O vicevoceiro do Grupo Parlamentario do PSdeG, José Manuel Lage, presentará no pleno do Parlamento de mañá unha moción na que se reclamará a elaboración dunha nova lei para os medios públicos de comunicación de Galicia, ademais do nomeamento dun novo director xeral da Compañía de Radio e Televisión de Galicia (Crtvg) por maioría reforzada de dous terzos dos deputados da Cámara.

Nun comunicado, o parlamentario socialista destacou que “o primeiro compromiso electoral” do actual xefe do Executivo autonómico, Alberto Núñez Feijóo, “foi incumprido no primeiro mes do seu mandato”, ao suliñar que nomeou “unilateralmente” a un director xeral da compañía, “só cos votos do PP”. “Xusto o contrario do que comprometera no debate de investidura”, incidiu Lage Tuñas.

Por iso, chamou o presidente da Xunta a “rectificar” e “facer propósito de emenda”. “É necesario acabar co control da televisión por parte do partido que goberna na Xunta”, recalcou Lage Tuñas para xustificar a petición dun novo director xeral da Crtvg que sexa elixido “por maioría reforzada, blindando a independencia das persoas que ocupen postos directivos”.

O deputado do PSdeG instou a “rematar coa televisión de partido” e avanzar cara un modelo “independente do goberno, onde os profesionais da comunicación non sufran as presións e as consignas partidarias dun goberno”.

José Manuel Lage Tuñas considera “imprescindible” levar adiante unha reforma en profundidade da Crtvg, delimitando ben a misión de servizo público, limitando a publicidade e dotando de maior estabilidade aos traballadores dos medios de comunicación.

O parlamentario socialista instou a “avanzar nun cambio de modelo que precisa introducir o pluralismo social, cultural e político nos medios de comunicación públicos, para rematar cun modelo xa caduco, onde se remate coa manipulación informativa”.